Aitona baten begietatik

Aitona eta amonek, gaur egun, beraien biloben heziketan eta zaintzan hartu duten rolaz idatzi zuen Itziar Bartolomek bere azken kolaborazioan.

“Haurrak zaintzeko pertsona bat kontratatzea ere “beharren” artean egongo litzateke, baina aitona-amonak beti laguntzeko prest daudenez, tira gastu bat gutxiago… Zaintza lanetan aurrezten dugunarekin hipoteka ordainduko dugu!”

Famili bakoitzaren testuingurua, egoera eta “beharrek” aitonek eta amonek duten rola ere baldintzatzen dute, eta Itziarrek zioen moduan orokortzea zaila da. Dena den, ezin uka gaur egun bizigaren jendartean eta familietan, aitona amonen eta oro har pertsona zaharren rola aldatu egin dela.
Francesco Tonuccik Con Ojos de Abuelo liburuan aitona baten ikuspuntua islatu zuen. Aitona baten begietatik kontatu zigun bilobarekin izan zuen eta zuen harremana, bere bilobei, eskainitako liburuan. Hauei idatzitako gutunak irakurditzakegu liburuaren lehen zatian, aitona izaten erakutsi zion 20 urteko Federicori eta 18 hilabete zituen Ninari. Gutun hauetan harremanaren berezia antzeman dezakegu, aitona eta biloben artean bakarrik sortu daitekeen harremana.

Baina dakigunez Tonuccik badauka bere alter egoa. Fratoren izenpean komiki ironiko, komiko eta batzuetan garratzak ere eskaintzen ditu liburuaren bigarren zatian. Komiki guztietan aitona-amonen eta biloben arteko harremanaz hitz egiten digu Fratok. Aspaldiko garaiak nostalgia puntu batekin gogoratuz eta gaur egungo jendarte teknologiko harrigarria, asko bizi izan duten begiekin aztertuz.
Liburuaren hirugarren eta azken zatian Tonuccik berriro ere atzera egiten du denboran eta bere txikitako jolasak aurkezten dizkigu. Gaur egun ere baliagarri izan daitezkeela argudiatuz.
Liburu gomendagarria, guraso moduan seme edo alaba ere bagarela gogoratzeko, gure guraso eta seme-alaben artean sortzen den harremana aztertzeko.