Era.eus etik akarri dugu testu hau.

Album  ilustratuak ez dira liburu ilustratuak. Albumetan irudia eta testua osagarriak dira, hau da, marrazkiek ez dute soilik hitzek diotena islatzen, hitzek adierazten ez duten hori baizik. Horrela, albumak modu berezi batez irakurri behar dira, irudiek diotenari erreparatuz. Gaur egun, oraindik, ohikoa da irakurleek album ilustratuak eta liburu ilustratuak nahastea. Albumek testu gabe ere funtzionatzen dute; liburu ilustratuetan, ordea, testuak kontatzen duena islatzera mugatzen dira marrazkiak.

Album ilustratuek duten beste bereizgarrietako bat da ez dutela zertan haurrendako izan. Azken urteotan  gero eta gehiago dira adinaren muga hautsi eta, ume eta nerabeez harago, irakurle helduei zuzenduta dauden obrak. Hortaz, adin guztietarako aproposak dira, baina, egia da lehen irakurleendako oso interesgarriak direla. Izan ere, lagungarriak dira haurrek galderak eta iruzkinak egin ditzaten, eta, horrela, albuma ulertu eta bere gisara kontatzeko. Irakurleak jarrera aktiboa izatea eskatzen du albumak eta bikoteka irakurtzeko oso aproposak dira.

Oso une egokia da ohera joan aurrekoa haurrekin irakurtzeko. Haurrei utzi behar zaie beren hautua egin dezaten, eta ez da ekidin behar liburu bera behin eta berriz irakurri nahi izatea. Haur askok buruz ikasten dituzte liburuak eta bere kasa kontatu.Euskal haur eta gazte literaturan, gaur egun argitaratzen diren album ilustratu gehienak itzulpenak dira. Sortu, apenas sortzen da haur eta gazte literaturan hain funtsezkoa den genero honetan. Horiek horrela, eta albumak euskaraz sortzeko eta argitaratzeko xedearekin, Etxepare saria antolatzen dute Nafarroako hainbat euskara zerbitzuk. Dagoneko 11 album saritu eta argitaratu dira euskaraz sari hori dela medio. Guztiak ere kalitate handikoak.

 

 

 

 

 

 

 

 

 

Testuaren iturria.

Azaleko irudia: Anthony Browne