Bergarako Jardun Euskara Elkarteak argi dute antzerkia lantzeak onura handiak dituela. Onura horien artean nabarmentzen dituzte ahozkotasunaren eta hizkuntzaren lanketa. Antzerki eskolak eskaintzen dituzte ikasturtean zehar. “Ahozkotasuna eta hizkuntza lantzea da helburua”, ahozkotasuna landuz “hizkuntza aberastu eta erabilera bultzatzeko”.

Aratz Sotil eta Ane Beistegi gaztetxoek antzerki eskolan parte hartu dute ikasturtean zehar. Sotil urrian hasi zen, eta Beistegi geroago, aurtengo martxoan: “Betidanik gustatu izan zait antzerkia eta Jardunek aukera hau eskaintzen zuela jakin nuenean izena eman nuen”, dio Beistegik. Datorren ikasturtean ere antzerki eskolan jarraitzeko asmoa dute, eta beste gaztetxo batzuk ere animatu nahi dituzte, “ondo” pasatuko dutela iritzita.

Jarduneko Maitane Arizabaletak azaldu du metodologia parte-hartzailean oinarritzen dutela antzerki tailerra. Neska-mutikoek antzezlan bat sortu behar dute ikasturte amaierarako. “Sormen-gune zabalak dira, diziplina ezberdinak lantzen dituzte. Antzerki eskolan egiten dituzten ariketak baliatzen dituzte ideiak hartzeko; eta, ondoren, antzezlana idazten dute, elkarren arteko iritzia errespetatuz irakaslea izanik bidelagun”, azaldu du . Metodologia parte-hartzailea da, “talde lana, elkartasuna eta hausnarketa” bultzatzen dituena.

Albistearen iturria hemen.