Araceli Larrea: “Hautua egindako andreak, behin hasita, ez dira geratzen ama izatea lortu arte

Umea zenetik ama izateko gogo bizia izan zuela dio, eta bikotekiderik izan gabe ere, urratsa egitea erabaki zuen. Atzo bete zituen 6 urte semeak: Ikerrek. Asteburu honetan elkarteko kideak Bilboko aterpetxean batuko dira, topaketa batean. Elkarren berri izateko baliatuko dute, eta antzeko erabakia hartzekotan dabiltzan andreei laguntza emateko. Bidea erakusteko.

Abaroa ematen al dizue elkarteak?

Bai, nik elkartea haurra izan eta gero ezagutu dut, eta ondo dator gure umeek ikusteko badaudela aitarik gabeko haur gehiago ere. Gero elkartea ondo dago, baita ere, orain nahita ama ezkongabe izatekotan dabiltzan emakumezkoentzat: klinikekin harremanetan jartzen laguntzen die, tratamenduen berri ere ematen die, eta esplikatzen zaie zer esan nahi duen guraso bakarra izateak.

Familia eredu normalizatua da?

Gero eta emakume gehiagok egiten dute hautu hori; gure artean nabarmena da. Arazoa da, hala ere, zenbait alorretan ez gaituztela aintzat hartzen; guraso bakarreko beste hainbat familiak izaten dituzten arazoak ditugu guk ere. Familia ugarientzat eta, esaterako, izaten dira laguntzak, eta guraso bakarrekoen kasuan ez da horrelakorik izaten. Bagoaz, esaterako, kiroldegira, eta beste edozein familiak bezala ordaindu behar dugu, eta gu bi kide bakarrik gara. Horregatik, gure familia ereduaren ezaugarriak aintzakotzat hartzea nahi dugu guk ere. Gainerakoan, inguruan nik ez dut eragozpenik igarri: nik, esaterako, eskola publiko batera eramaten dut umea, eta arazorik ez. Beste eskoletan, esaterako itunpeko zentro erlijiosoetan, arazo gehiago izaten dira: aitaren eguna eta amaren egunak eta antzekoak izaten dira, eta eragin diezaioke horrek umeari… Baina nik ez dut aparteko arazorik ikusten.

Erabakia hartzekotan dabiltzan andreen artean zein izaten dira kezkarik ohikoenak? Zein dira galderak?

Nire kasuan, kezkarik handiena zen nik bakarrik ama ona izaten asmatuko ote nuen. Eta, egiatan, ez da horren erraza; finean, zu bakarrik zaude denerako. Bada jendea dioena horrek abantaila ere baduela, era horretan ez delako eztabaidarik izaten bikotekidearekin haurra hazteko eraren inguruan. Baina zaila da, eta, zenbaitetan bakarrik ikusten duzu zeure burua; ez da erraza. Erabakitzekotan dabiltzanek argi izan behar dute hori. Familiaren laguntzarik gabe, batez ere, ez da batere erraza. Eta gero, haurdun geratzeko tratamenduak eta halakoak ere ez dira batere samurrak. 40 urtetik aurrera, esaterako, osasun sistema publikoak ez ditu egiten, eta klinika pribatuetara jo behar da. Tratamenduak ez dira merkeak, eta psikologikoki ere gogorra izaten da prozesua… Eta ama izateko erabakia aztertzen ari diren andre gehienek, hain justu, tratamendu horien inguruko galderak izaten dituzte. Ama ezkongabea izateagatik aparteko laguntzaren bat jasoko duten jakin nahi izaten dute zenbaitek; eta, laguntzak guztiontzako izaten direnak dira.

Familiaren eta ingurukoen babesa zinez garrantzitsua da, beraz…

Bai, bai, nire iritziz bai. Nire kasuan oso ondo hartu zuten. Bizi osoa neraman ume bat izan nahi nuela esaten: ama izan nahi nuela esaten. Ez zen gutizia bat, barru-barruan nuen: eta ez zen apaltzen. Sarri askotan esaten dut, kontra eragozpen handiak izanda ere, askotan denera iristeko nahi eta ezinean ibilita ere, bizitzan egin dudan onena horixe dela. Nirea bizitzan dudan hoberena da.

Zer egiteko asmoa duzue asteburu honetako Bilboko topaketan?

Bihar, 11:00etan, Jar iezaiozu aurpegia ekitaldia egingo dugu; gure elkartea aurkezteko izango da, eta biltzen diren pertsonen galderak erantzuteko. Gero, asteburu osoan, aterpetxean hainbat ekitaldi egingo ditugu guk gure artean elkarren berri izateko, eta gure kezken eta bizipenen inguruan mintzatzeko.

Bihar goizeko ekitaldi hori irekia izango da, beraz. Bikotekiderik gabe ama izatekotan dabiltzan horiengana iristea da zuen jomuga nagusia?

Bai, eta, nire ustez, ondo dago hori. Neuk, esate baterako, ama ezkongabea izateko erabakia hartu nuenean ez nuen hautu bereko beste emakumezkorik ezagutzen nire inguruan.Hautua egiten duten andreak, behin hasita, ez dira geratzen ama izatea lortu arte. Prozesuan babesa izateko arras garrantzitsua da elkartea.

Elkarrizketaren eta argazkiaren iturria Berria.