Euskal Herriko neska-mutiko gehienak hasita daude Olentzerori gutuna idazten. Gurasoen kezka berriz beti da antzerakoa: zein ezaugarri ditu jostailu on batek? zenbat jostailu eskatuko dizkiogu Olentzerori? Umeak eskatzen duena egokia iruditzen ez bazaigu nola jokatu behar dugu?

Arrasateko Txatxilipurdi elkarteko dinamizatzaile Arantxa Osorok hainbat pista eman ditu Goiena telebistako Debagoiena Zuzenean saioan egindako elkarrizketan. “Jostailuak, berez, ez dira txarrak edo onak; dira egokiak edo ez dira egokiak”, adierazi du. Gomendatzen du haurraren garapen maila kontuan hartzeko aukeraketa egiterakoan. “Haur bakoitza mundu bat da eta adin bereko bi ume oso ezberdinak izan daitezke. Jostailu bat izan daiteke egokia batentzat eta ez bestearentzat”.

Jostailuen egokitasuna

Osororen iritziz egokiak dira haurraren interesa iratzartzen eta mantentzen duten jostailuak. Sortzailetasuna bideratzen dutenak eta taldean zein bakarka jolasteko aukera ematen dutenak ere bai.

Ez dira egokiak indarkeria bideratzen dutenak edo sexistak direnak. Adituaren esanetan erraz antzematen da iragarkietan edo katalogoetan zeintzuk diren jostailu horiek.

Jostailu kopuruari baino jostailuen kalitateari garrantzia emateko aholkatzen du Osorok. “Gaur egun haurrek jostailu pila jasotzen dituzte Gabonetan. Kontuan izan behar dugu jostailuek horrela ez dutela merezi duten balioa hartzen umeentzako. Gehiegi direla iruditzen bazaigu komeni da batzuk erretiratzea eta urtean zehar ateratzen joatea poliki-poliki”. Osorok dio material bereziekin egindako jostailu gero eta gehiago daudela: zurezkoak, jolas librerako direnak, kooperatiboak… “Iragarkietan ez dira hainbeste agertzen baina egon badaude eta gero eta gehiago”, adierazi du.

Umeak eskatzen duena egokia da beti?

Gerta daiteke umeak egiten duen eskaera ez datorrela bat gurasoen ideiarekin. Oreka mantentzeko gomendioa egiten du Arantxa Osorok. “Komeni da umearekin hitz egitea jakiteko zergatik eskatu duen jostailua, zer ikusi duen iragarkian hainbeste gustatu zaiona… Batzuetan irudia da, edo musika edo iragarkian agertzen den pertsona bat”.

Komeni da baita ere aztertzea eskatu duen jostailu hori. “Ez da beti erraza izaten baina komeni da dendara joan eta eskatu duen jostailua ikustea. Barrutik nolakoa den ikusteko aukera ematen badigute askoz ere hobeto. Batzuetan gertatzen da iragarkian pieza asko ikusten direla baina gero kutxan ez direla hainbeste etortzen”. Osorok azaldu du  Txatxilipurdi elkartean badutela Probatu eta gozatu! ekimena. Aukera ematen du euskarazko jostailuak probatzeko.

Jostailuen argazkiaren iturria hemen.