2008ko azaroaren 26an inauguratu zen Arantzazuko ibilbide irisgarria. Desgaitasunen bat duten pertsonak –fisikoa, ikusmenekoa, entzumenekoa, adimenekoa edo organikoa, aldi baterakoa edo iraunkorra– natura inguruneaz gozatzeko aukera dute.

Arantzazu eta Gomiztegi arteko ibilbidea parketxearen ondoan dagoen Kristo Santuaren santutxoaren albo batean hasten da. XVIII. mendeko eraikin txikia da, eta antzina, otoitzerako lekua izaten zen.

Hortik abiatuta, oso ondo markatuta dagoen bidea hasten da. Ezker-eskuinean barandak daude. Gainera, ezintasunak dituzten pertsonendako egokitutako altzariak eta panel informatiboak. Azken horietan, unean uneko faunaren eta floraren gaineko informazio ematen da, euskaraz eta braillez.

Led motako argiak 

Ibilbidea hasi orduko paseoan dagoen aldapa gogor bakarra aurki daiteke. Oztopo hori gainditzeko, egurrez egindako pasarela irisgarri eta ikusgarria dago. Era berean, barandan, tarteka, datorrenari buruzko ukimen-plakak daude: ibilbidea bukatzeko zenbat falta den, aurrerago dagoen horri buruzko informazioa… Horiek guztiak eskura ditu ibiltariak. Horiek ere, euskaraz eta braillez.

Lurzoru sendoa dauka, irristagaitza eta deformatzen ez dena. Zorua gurpildun aulkiendako eta ibiltzeko zailtasunak dituztenendako egokia da. Zoruaren erdialdean testura ezberdina dago, itsuei gidatzen lagunduko diena.

Ibilbidearen argiteriari dagokionez led motako argiak daude, argitasun txikia duten tokiak argitzeko. Bestalde, norabidea adierazteko argiak ere badaude: berdeak, Arantzazurako noranzkoan, eta gorriak, Gomiztegiruntz. Azkenik, larrialdietarako bi telefono daude, atseden gunetik gertu.

Begiratokitik, mendiei begira 

Egurrezko pasarelan dagoen begiratokitik, parean dauden mendian zeintzuk diren ikus daiteke: Gazteluaitz, Uburu, Uztao, Larrangoiti, Keriztugaña, Usabakotxena, San Juan Artia, Andarto Anboto, Orkatzategi, Arrikrut eta Aloñaziarra, besteak beste.