Euskararen erabilera sustatzeko Aretxabaletako guraso talde batek sortutako E! Guraso!  ekimenak harrera ona izan du herrian; izan ere, 140 bat gurasok eman dute izena ekimenean parte hartzeko.

 

Txapa berdeak eta horiak

Orain, txapak banatuko dituzte izena eman duten gurasoen artean. Bi txapa mota daude; bata, berdea da eta bestea horia. Txapa berdea daramatenek euskaraz ulertzen eta hitz egiten dute eta konpromiso hori hartzen dute. Horia daramatenek ulertzen dute euskara eta saiatuko dira hitz egiten, baina izan daiteke zailtasunak izatea. Horrela azaldu du Aitor Lizarazu gurasoak.

Esperientzia pertsonalak jaso

Astebetez proba egin ostean esperientzia pertsonalak jasoko dituzte: “Orri bat bete beharko dute parte-hartzaileek, balorazio bat egiteko. Zer moduzko esperientzia izan den jaso nahi dugu; zaila iruditu zaien, prest dauden dinamika honekin jarraitzeko… Hiru astetan egingo dugu, Euskararen Eguna den astera arte”, azaldu du Lizarazuk.