Argitalpena: ‘Hartza ehizatzera goaz’ (+ 2 urte)

Bi urtetik gorako umeentzako ipuin aproposa da Michael Rosen idazlearen Hartza ehizatzera goaz ipuina. Ilustrazio lan bikaina dauka gainera txikitxoenak erakartzeko.

Pamiela etxeak kaleratu zuen iaz. Egitura klasikoa duen ipuin kateatua da eta bat egiten du haurren munduarekin. Familia osoa abentura zirraragarri batean murgiltzen dira hartza ehizatzera abiatzen direnean. Bidean, hainbat oztopo aurkitzen dituzte —belardia, lokatza, ibaia, basoa, elur-ekaitz zirimolatsua— eta denak zeharkatu beharko dituzte.

Ilustrazioek indar handia hartzen dute ipuinean: zuri-beltzean eta arkatzez eginda daude familiak aurrera egiten duenean, eta koloretako akuarelaz, oztopoa gainditzera doazenean. Ipuin ederra, ozen irakurtzeko haurrekin batera.