Txomintxo eta Perutxo haur bihurrien beste abentura bat; oraingoan, irakaslea falta dela-eta, bien artean saiatuko dira Iosu ikaskideari fardela aldatzen. Lehen aldia dute horrelako zeregin batean, baina ez dago ezer gure mutikoak beldurtuko dituenik. Eta gero gerokoak.

Captura de pantalla 2014-12-12 a las 10.01.47

 

Txomin eta Peru Magdalena anaiek idatzi dute ipuina. Elkar argitaletxeak argitaratu du eta 6-8 urte bitarteko umeentzako gomendatzen dute. Jarraian Anboto aldizkarian egileei egindako elkarrizketa.

Zer kontatzen du liburuak?
Peru Magdalena: Ikasgelan daude, eta une zoro bat bizi dute. Ume batek zauri bat egin du, beste batek arrastaka daroa ikaskide bat, batzuk kantatzen dabiltza… Irakasleak ezin du egoera kontrolatu. Halako batean, Iosuk kaka egin duela dio, eta Txomintxo eta Perutxo anaia bikiek eurek aldatuko diotela esan diote. Sekulakoak egiten dituzte. Lehenengo irakurleentzako ipuin bat da.

Gai berezia da kaka eta fardelen aldaketena.
P.M.: Bai. Era libre eta umoretsu bategaz landutakoa. Izan ere, gurasoen artean trauma piloa egoten da: umeari fardela behin betiko kentzeko lasterketa lelo bat egoten da euren artean. Sagar bakoitzak ere bere unea du jausteko, eta denok amaituko dugu fardel barik; beraz, ez zoratu.
Txomin Magdalena: Gaiari pisua kentzea da helburua. Mezu hori badu. Edozelan ere, moral puntu bat eduki arren, dibertigarri izateko nahia gailentzen da.

Benetako pertsonaietan oinarritu zarete.
P.M.: Iosu liburuko marrazkilaria da, eta ipuinean sartu dugu. Irakaslea, berriz, Jose Martin Urrutia Txotxe da. Izan ere, pilo bat maite dugu Txotxe. Motots eta guzti agertzen da! Gero, gu bion klaseetan ibilitakoak ere badaude. Euretako batek esan zidan ea noiz geratuko garen diru kontuez berba egiteko! [Barrez].

Ondo pasako duzue sorkuntza prozesuan, ezta?
T.M.: Dibertigarria da liburuak bion artean lantzea. Biok gara aita, ipuin kontalariak, ni irakasle ere banaiz… Anekdota piloa sortzen zaizkigu, eta horiek partekatu, eta idazten joaten gara.
P.M.: Berba egiten dugu, eta idatziak elkarri bidaltzen dizkiogu. Gero, proba modukoak egiten ditugu, ozen irakurrita. Izan ere, garrantzi handia ematen diogu ahozkotasunari.

Hirugarren lana da hau. Beraz, baduzue arrakastarik.
T.M.: Aurreko liburu biak bigarren edizioan daude, beraz, saldu dira. Pozik gaude, horrek idazten jarraitzeko aukera eman ahal digulako.
P.M.: Hitz liburu dendako aurkezpenean, ume batzuek buruz zekizkiten aurreko ipuinak. Laster panpinak ateratzen hasi beharko dugu, Pirritx eta Porrotxen moduan [barrez].