Badira egun batzuk Españako parlamentuan VOX-en zentsura-mozioa eztabaidan izan zutela.

Egia esan behar badut, ez nuen asko jarraitu. Ez zidan interes berezirik sortu komunista izandako agure batek orain eskuin muturrean aritzeak. Eta gaiak izan dezake mamia: zer eraman diezaioke komunista izandako bati orain halako jendeaz inguratzeko?

Soziologo batentzat azterketarako gai interesgarri izan daitekelakoan nago, baina niri beste hausnarketa batera eraman nau gaiak:

Nola ari da eskuin muturreko mezua gure gizartean txertatzen?

Oso sektore zabaletan, baita bere burua aurrerakoiak dituzten horietan ere, geroz eta gehiago dira halako mezuak ahotan dituztenak:

“Diru laguntza sozial guztiek haiek eramaten dituzte”; “Ez dira batere saiatzen lana aurkitzen, diru laguntzetaz bizi dira soilik”; “Ez dira gure kulturan batere integratzen”; eta abar luzea.

Ez naiz inozoa, eta jakin badakit iruzurrak ere badirela… Baina Goldman Sachs, Credit Suisse, Barcenas edo Ere mailakorik  ez inondik ere!. Eta aipaturiko hauen atzetik ez dugu “inmigrazio” askorik ikusi.

Hori baita –ustez- amankomunean duten elementua alfer iruzurti hauek: kanpotik etorritakoak direla. Ustez diot, hau ere gezurra baita: EEBBetatik etorritako familiak, sendagilearengana  joan eta hizkuntza arazoa izanez gero, ahalik eta hoberen ulertarazten saiatuko dira (mediku, erizain, …). Hori bai, adibide gisa, afrikatik etorritakoak badira, ohikoa dugu hauxe entzutea: “gure hizkuntza ikas dezatela!” (honek bai euskara bai gaztelerarako balio dezake).

Plisti Plasta, Lizarrako Jolas gune eta Familia gunean, hainbat zerbitzuen artean badugu Lizarrako udaleko Zerbitzu sozialekin batera antolaturiko asteroko Familia gune saioa: bertan, ez dira soilik inmigranteak parte hartzaileak, baina partaide esanguratsuak dira, eta talde honetan badute arnas gunea.

Saio hauetan sarri entzuten diegu nola tratatuak izan diren hainbat zerbitzuetan: osasun zerbitzuak, eskoletan, administrazioa… Batzuetan pazientziarik gabe tratatuz, besteetan beraien aldetik errietak jasoz, mesfidantza sentituz, …

Eta hauxe da lehen aipatu dudan kezka, eskuin muturreko mezu hau iragazkortasun handia izaten ari baita:

Haur eskola bateko hezitzailea kexaka, bere gela “kanpotarrez” bete dela, eta bertakoek ez dutela lekurik (galdetuz gero eta “bertakoek” haurrik ba ote duten, ez du erantzuten);

Eskolako hezitzaileak ama magrebtarrari esan bere semea medikuarena eraman eta ea entzumenezko froga egiten dioten, baina zalantzarekin geratu da amak ulertu ote dion, eta ez da saiatu bere pediatrarekin harremanetan jartzen  jakiteko prozesua nola doan;

Ama ijitoa duen semea ez onartu 3 urteko gelan, matrikulazio data pasa baizitzaion;

Pediatrak errieta egin amari urgentzietara “tontakeri” batengatik eramateagatik, eta aldi berean berriz errieta egin lehenago haurra ez eramateagatik;

Zerbitzu sozialetako langileak mehatxatu diru laguntza kenduko ote dioten paperen bat garaiz ez eramateagatik (adibidez, Alemaniako familia baten kasua izan balitz, berdin hitz eginen litzaioke?)

Kasuen zerrenda nahi adina luzatu dezakegu, asteroko saioetan jasotzen baititugu.

Aurretik aipatu lez, ustez amankomuna duten elementua kanpotarra izatearena da, baina, benetan, lotzen dituena, txiroa izatea.

Eta pobre izate honek bere burua kokiltzen du, gutxitzen du,  konfiantzarik gabe utzi arte. Ezin dutela, ez direla gai sentitzen dute:

Ez dakitela beren burua zaintzen; ez dakitela beren seme-alabak zaintzen.

Familia guneetako saio hauetan gure lehen helburua familia hauek ahalduntzea da. Prozesu honetan beraien barneak ezagutzeko aukera dugu, hobe ezagutzeko haien zergatiak. Eta bide honetan, oso lagungarri egin zait ondorengo bideoa:

Espero dut bideoa ikusi eta lerro hauen ondoren gure aurriritziak ezabatu eta modu duinagoan tratatzea hain beharrezkoak ditugun gizon eta emakume hauek.