Hasi da Codesyntax enpresak sortutako Egunean Behin joko arrakastatsuaren hurrengo denboraldia. Galdera erantzunen jokoa da, euskaraz, doaneko aplikazio baten bidez jokatzen dena. Astelehenean hasi zen, eta hamar aste iraungo du: apirilaren 6ra arte. Euskararen erabilera sustatzeko asmoarekin, Euskaraldiak eta Eusko Jaurlaritzako Kultura eta Hizkuntza Politika Sailak babestuko dute.

Egunean hamar galdera erantzun beharko ditu jokalariak. Txikientzako zaila izan daitekeen arren, nerabeentzako joku aproposa izan daiteke, jakintza arlo ezberdinak modu dibertigarrian lantzeko. Gainera, astero sari bat zozketatzen da jokalarien artean.

Denboraldi amaieran, sari nagusiak banatuko dituzte: lehen sailkatuari telebista bat emango diote; bigarren eta hirugarren sailkatuei, telefono bana; eta aurikularrak eskuratzeko aukera ere izango da zozketa bidez.