Mirari Bikuña emaginak azala azalarekin kontaktua gaia izan du berbagai Puntua aldizkarian argitaratu duen bere azken kolaborazioan.

Badakigu pertsonen arteko edozein kontaktuk onurak dituela pertsonengan, baina ukitze horien guztien artean, bereziki, ume jaioberrietan gomendatzen den azala azalarekin kontaktua nabarmendu behar da.

Azala azalarekin kontaktua kanguru metodoa izenez ere ezagutzen da eta ume jaioberria jaio eta berehala amaren sabel eta bular biluziarekin kontaktu zuzenean jartzean datza, bertan ahal den denbora luzeen egoteko helburuarekin. Metodo hori Kolonbian jarri zen martxan, 70eko hamarkada bukaeran. Hango pediatra talde bat bi kilotik beherako umeen zaintza teknika bezala erabiltzen hasi zen, eta berehala konturatu ziren metodo horrek zituen onura guztiekin.

Hainbat ikerketa egin dira metodo horrek dauzkan onura eta segurtasuna ikusteko; besteak beste, pisu irabazi hobea, infekzio nosokomial gutxiago, gorputzeko tenperaturaren termorregulazio hobea, edoskitze-iraupen luzeagoa, ospitalizazio denbora txikiagoa… eta amaren eta umearen arteko loturan lagungarria dela ikusi da.

Edoskitzearen iraupena

Ikerketen arabera, nabarmen ikusi da azala azalarekin egiteak edoskitzearen iraupena luzatu egiten duela, baita jaioberri goiztiarren kasuan ere. Ukimen, usain eta bero estimuluek nerbio bagoa era eraginkorrean suspertzen dute, oxitozina hormona jarioak sortzen dituzte eta, horren ondorioz, edoskitzean eragin positiboa lortzen da.

Portaera neurosentsoriala

Metodo hori erabiltzen duten umeek denbora luzeagoko loa eta lo lasaiagoa dutela ikusi da. Baita flexio-postura eta mugimendu handiagoa izaten dutela ere, luzapen posturekin alderatuz. Gainera, ama ez den gurasoarekin eginiko ikerketetan, umeak negar gutxiago egiten dutela, lo sakonagoa dutela eta lasaiago egoten direla baieztatu da.

Bestalde, azala azalarekin kontaktua mantentzen denean, min estimuluen aurrean, minaren eskalan oso puntuazio baxua izaten dituzte ume horiek.

Tenperaturaren erregularizazioa

Erditze ondorengo momentuan, umeak umetokitik kanpo baldintza berrietara moldatu behar izaten du. Horretarako, gorputzeko tenperatura maila egokian mantendu behar da eta azala azalarekin metodoak hori bermatzen du.

Ospitaleratze egunak

Umearen garapenean perimetro entzefaliko handiagoak eta infekzio nosokomialen larritasuna txikiagoak direla ikusi da; baita kortisol maila baxuagoak dituztela ere. Hipogluzemia kasuak ere nabarmen jaisten dira metodo hori erabiltzen denean. Horren ondorioz, umeek ospitalean igarotzen duten egun kopurua ere nabarmen jaisten da.

Garapena eta elkarreragina

Azala azalarekin egiten duten amek afektibitate positibo eta seme-alaben seinaleetara egokitze handiagoa erakusten dute, baita depresio gutxiago ere. Umeen kasuan, alerta handiagoa ikusi izan da.

Umeen garapen mentalean eta garapen motorrean puntuazio altuagoak izaten dituztela ere baieztatu da, baita koefiziente intelektual altuagoa izateko joera dutela ere.

Ama-ume lotura

Zenbat eta denbora luzeagoan mantendu azala azalarekin kontaktuan, orduan eta lotura hobea sortzen da amaren eta umearen artean. Gizaki bezala, jaioberriek euren biziraupenerako pertsona baten beharra dute. Kontaktu horrek pertsona horren presentzia hor dagoela ziurtatzen du eta umeek atxikimendu segurua lortzen dute. Ikusi da atxikimendu seguru horrek autoestimu hobea, depresio gutxiago eta gizaki autonomoagoak osatzen dituela.

Amaren lasaitasuna

Aurretik ikusi dugun guztiarekin, amek ere askoz lasaiago igarotzen dituzte erditze ondorengo ordu eta egunak. Umearen egoera orokorra hobea izaten denez, eta garapena bide luzeenetik joateko aukera gehiago dagoenez, amen lasaitasunak umeari eskaini behar zaion arreta ere hobea izaten laguntzen du.

Azala azalarekin kontaktua ez da moda kontua, ondo ikertu den eta onurak besterik ez duen metodo bat baizik. Beraz, zenbat eta denbora luzeagoan mantendu, hobe.