Jolasgune berri bat dago Oñatin. San Martin auzoan eraiki dute eta Baratzeko Pikua du izena. Jolasguneak bi zati ditu: goiko aldean hosto iraunkorreko arteak eta gereziondo japoniarrak daude, eta behekoan, berriz, landareekin, urarekin eta harearekin jolasteko espazioa.

Iñigo Segurola paisajistak diseinatu du jolasgunea eta adierazi du espazio alternatiboa dela Baratzeko Pikua. “Haurren Hiria liburuko eredua jarraituta egindako proposamena da, eta bilatu dugu jolasteko beste modu batzuk sustatzea, haurrek beraien artean elkar eraginez. Normalean umeek gainean izaten dituzte gurasoak eta hemen baranda bat dago. Ideia da umeak jolasgunean egotea eta gurasoak goian”.

Segurolak azpimarratu du espazio anitza dela non bustitzea eta lokaztea ahalbidetuta dagoen. Parkearen erdian pikondo bat dago, hain zuzen ere parkeari izena ematen diona.

“Inguruan dauden pneumatiko erraldoi batzuetan usain belar bereziak jarri ditugu. Ideia da hostoak ukitu eta igurtzi ahala usainak umeengana heltzea.

Hondar gune bat ere badago aranondo batekin. “Pikuak irailean emango ditu fruituak eta aranondoak, berriz, ekainetik uztailera. Ideia da sortu ahala umeek fruituak jan ahal izatea. Eta hondar gunean badaude pago enbor lehor batzuk erraldoi itxura dutenak. Gunea babestu moduan egiten dute eta interaktiboak izan daitezke; izan ere, enbor horietan egongo dira kakalardo berezien larbak”.

Bi sargune dituen parkea

Bi sargune ditu parkeak: landarez egindako arku bat eta txirrista bat. Panel informatibo bat ere badauka bertako landareen eta animalien berriz emanez.

“Erdiko espazioan ura jarri dugu hiru iturrirekin eta kanporako bidea hartzen duen bitartean jolaserako baliabide izan dadila. Inguruan totem itxura sortuz tamaina handiko akazia enborrak ere jarri ditugu zutik. Horrekin batera tipi bat ere badago akazia enborrekin eginda, eta rokodromo bat.

Naturako elementuek ematen dituzten koloreei beltza eta zuria gehitu dizkiete.

Gehiago jakiteko ondorengo bideoan dituzue Segurolaren azalpenak.