Barazkiak lorontzietan, handituz doan fenomenoa

‘Bizi Baratzea’ liburua da Usurbilgo paisajista Jakoba Errekondoren azken argitalpena. Herriz herri ari da liburua aurkezten, eta uda sasoi honetarako hainbat gomendio interesgarri aurkituko ditugu bertan.

Hamaika telebistako Udakoak saiorako Inaxio Esnaolak egindako elkarrizketa ekarri dugu gurera. Bertan udako landaketak dituzte hizpide, eta baita ere etxean baratzea egitearen fenomeno gero eta handiagoa. Umeekin landu daiteke baratzea etxean.

Udaberria eta batez ere uda dira baratze-zaintzarako sasoirik onenak. Urtaroak asko laguntzen du, eta gehienok denbora libre gehiago dugu. Etxean baratzea egitea gero eta gehiago zabaltzen ari den fenomenoa da. “Iruditzen zait ez dela bolada bat”, dio Errekondok. “Zabaldu eta sakondu egingo dela uste dut”. Kontsumo taldeen eta herri baratzeen hedatzearekin lotzen du fenomenoa usurbildarrak.

Lehenengo landaketak etxean

Loreontzietan edo bestelako edukiontzietan prestatu daiteke baratzea etxean. Uda garaian etxean landaketak egin nahi dituen edozeini belarrak proposatzen dizkio Errekondok. “Gauza gutxi emanagatik askotan erabil daitezkeelako, eta platera asko janzten dutelako”, dio. Hala, loreontzi bat perrexil edo menta proposatzen ditu. Barazkien artean, berriz, porrua eta tipula aipatzen ditu. Beste aukera bat dira bero zaleak diren landareak eta egiten errazak direnak; tomatea edo piperra, esaterako. “Hasteko belarrak, eta cherry tomateak”, dio. “Errazak eta oso emaleak dira”, azaltzen du.

Kontzientzia hartzea haurtzarotik

Errekondok garrantzitsua deritzo umeek landareak hazten ikustea. “Urte askoan lurretik urrunduta bizi izan gara (…) eta orain buelta dator. Kezkatuta gaude zer jaten dugu, kezkatuta gaude gure ingurumena nola zainduko den, non bizi garen, ze aire arnasten dugu… Eta kezka hori jaten dugunetik hasten da”, dio usurbildarrak. “Balkoi batean, loreontzi batean letxuga bat hazten ikusten duen ume batek… pentsa etorkizunean! Hura izango da zinegotzi, alkate edo politiko eta buru horrekin etortzen bada irauli egingo dugu gaur egungo egoera”.

Argazkiaren iturria hemen