Haur ipuinen generoaren barruan, 8-12 urte bitarteko neska-mutikoei zuzendutako argitalpena kaleratuko dute Igartubeiti Baserri Museoak eta Untzi Museoak.  Euskarazko kontakizun laburren IV. lehiaketa antolatu dute eta saritutako lanak jasoko dituzte album ilustratu batean abenduaren 3rako.

Deialdiaren gaia baserria eta itsasoa izan da. Erdi Aroaren amaieran, arrantzaren gorakadarekin batera, dolare baserria sortu zen. Lantegi izugarriak ziren eta tokiko kontsumoa hornitzeaz gain, merkataritza eta arrantza itsasontziak ere hornitzen zituzten.

Lehiaketan hamalau lagunek hartu dute parte. Lehenengo saria Maialen Akizuk jaso du Itsasoa opari kontakizunarekin. Bigarren saria Idoia Garzesen Anaia bi ipuinak eraman du eta hirugarrena Ainara Elizondok Uhinak beti gazi lanagatik.

Euskararen Egunerako iragarri dute argitalpen ilustratua. Historian zehar sagardoak, baserriak eta itsasoak garrantzi handia izan dute Euskal Herrian. Neska-mutikoei errealitate hori transmititzeko bidea izango da.