Ione F. Zabaleta eta Enara I. Dominguez daude Ara!Gorputzez proiektuaren atzean eta ikasturte hasiera honetan Hilerokoa Eskoletan programarekin lotutako berrikuntzen berri eman dute.  

Lehen Hezkuntzako 4., 5. eta 6. mailetako haurrei eta eskoletan lan egiten duten heldu guztiei bideratutako saioak eskaintzen dituzte, eta lehen hilerokoaren inguruko informazioa ematea eta menarkia bide-laguntzeko tresnak partekatzea dira saioen xedeak.

“Aldaketa handiak eman dira azken hamarkadetan, baina hilerokoa oraindik ere tabua da. Haurrak gizartearen isla diren heinean, tabuaren termometro egokia dira. Hilerokoaz galdetzen diegunean, haur gehienek (hilerokoa eduki edo ez) hitz hauek errepikatzen dituzte: mina, nazka eta beldurra. Horrek, hilerokoa dugun pertsonen bizi-baldintzetan ondorio lazgarriak ditu”, azaltzen dute.

Urtero-urtero material pedagogikoa sortzen dute eskoletan gaia era autonomoan landu ahal izateko. Horrez gain, haurrei zein helduei bideratutako saioak ematen dituzte. “Mutilek ere parte hartzen dute saioetan beraiei ere eragiten dien fenomeno delako hilerokoa. Informatuta egoteko eskubideaz gain, hilerokoa dugun pertsonen zaintzan inplikatzeko baliabideak behar dituzte”.

Ikasgela bakoitzarekin ordu  eta erdiko saioak egiten dituzte. Helduekin bi ordukoak ere izan daitezke.

Hainbat baliabide

2019tik urtez urte hainbat baliabide sortu dituzte irakasleek gaia modu ‘autonomoan’ landu ahal izateko. Horien artean dira unitate didaktiko bat, Ziklikoa naiz! bideoa, norberaren zikloaren erregistroa egiteko ziklograma eta gaiari ikusgarritasuna emateko zenbait ilustrazioa. Gainera, azken ikasturtean bi ildo berri batu dizkiote programari. 

– Zikloan APP-a: Hilerokoaren erregistroa mugikorraren bidez egiteko euskarazko lehen aplikazioa.

– Hilerokoa lantzen duten eragileen katalogoa.

Informazio guztia eta kontaktuan jartzeko modua aragorputz.eus atarian daude ikusgai.