Urtarrilarekin batera udara begira jarri ohi dira Bertsozale Elkartean: Bertso Udalekuak antolatzen hasteko sasoia izan ohi dute.

Otsailaren 6a izango da lehenengo data garrantzitsua: izan ere, begirale, zuzendari, sukaldari eta begirale praktikak egin nahi dituztenentzako izen-emate epea zabalduko da eta otsailaren 16ra arte egongo da irekita. Ondoren etorriko da haur eta gaztetxoen izen ematea.

Bertso Udalekuetako hezitzaileentzako prestaketa saioa maiatzeko bigarren asteburuan izango da, maiatzaren 9tik 10era Astigarragako Santiagomendi aterpean (Gipuzkoa). Bertan parte hartzea ezinbestekoa izango da, Bertso Udalekuen antolaketa ona ziurtatzeko.

Ohiko modura, izen-ematea bertsozale.eus webgunearen bidez egin ahal izango da. Martxoan emango dute osatutako lantaldeen berri.

Gaztetxoen izen-ematea, martxoan

Gaztetxoen izen-emateari dagokionez, martxoaren 3an zabalduko dute. Kasu honetan ere bertsozale.eus webgunean egin daiteke izen-ematea. Laster emango dituzte xehetasun guztiak.

Eusko Jaurlaritzak eta Bizkaiko Foru Aldundiak babesten dute Bertso Udalekuen egitasmoa, eta Irizarrek laguntzen du.