Iraila ezkero, bertsolaritza lantzeko modu berri bat dute Lesakako Irain eskola publikoan; 2 urtetan hasi eta 12 urtera bitarte landuko dute, zeharka
lehen urteetan, eta 5. mailatik aitzinera zuzenean.

Proiektuaren izena Bertsolaritza Irain Eskolan du izena eta Eneko Fernandez da proiektuaren sustatzailea. Helburua da bertsolaritza haurrengana hurbiltzea, eta haurrek kantatzeko ohitura berreskuratzea aspaldi kontutaru baitziren haurrek kantatzeko ohitura galdua zutela.

Ohitura hori berreskuratzeko eta LH 5 mailan bertsolaritza zuzenean lantzen hasten direnerako bertsoaren gutxieneko ezagutza bat izateko sortu dute Bertsolaritza Irain Eskolan.

Bertsoa tresna didaktiko

Horretarako, bertsoa tresna didaktiko bihurtu dute. Errutinak eta arauak ikasteko tresna, baina baita ipuinak eta emozioak lantzekoa ere. “Gelan ipuin bat lantzen denean, hori ahoz kontatu ondotik, bertsotan aditzen dugu”, azaldu du Eneko Fernandez eskolako irakasle eta proiektuaren sustatzaileak. Hilabeteak ikasteko kantak egin dituzte, baina baita Lesakako txokoen berri ematen duten bertso sortak, eta igerilekura joaten direnerako arau multzoen koplak ere.

Adibide bat paratu du Fernandezek: “Geografia lantzen ari ginen gelan, eta erakutsi nien Euskal Herriak zazpi probintzia dituela eta eta zein diren horien hiriburuak. Errepasatzean, ordea, konturatu nintzen ez zutela batere barneratua. Orduan, kopla batzuk egin genituen elkarrekin hori ikasteko, eta horiek kantatuta ikasi zuten. Oraindik ere gogoan dituzte koplak”.

Material didaktikoa sortu

Behin proiektua idatzita, egin beharreko lan garrantzitsuena materiala prestatzea izan da. Fernandezek azaldu duenez, material parrasta dago sortua Bertsozale Elkartearen bertsoikasgela.eus atarian, eta hori antolatu dute lehenengo, eta ondotik, gabeziak atzeman dituzten lekuetan material berria sortu dute. Batez ere txikienentzako materiala sortu behar izan dutela azaldu du.

Hurrengo helburua, gizarteratzea

Hurrengo helburua gizarteratzea da. Horretarako, Nafarroako Bertsozale Elkarteak antolatuta irakasleentzako formakuntza eginen dute urtarrilean Lekarozen eta Uharten. Ikastaro horietan Irainen egindako proiektuaren nondik norakoak azalduko dituzte.

Fernandezek nabarmendu duenez, helburua eskola sare bat lortzea da, materiala partekatzeko, eta denen artean elkar elikatzeko. Interesa erakutsi dute dagoeneko ikastetxe batzuk, eta horiekin elkarlanean aritzeko prest da Fernandez: “Ez nuke nahi hau alde batera utzita dagoen liburu bat bezalakoa izatea, baizik eta bizirik dagoen eta erabiltzen den tresna izatea”.

Argazkia: Ttipi-Ttapa

Albistea eta argazkia: Ttipi Ttapa (15. orrian) eta erran.eus