Bixi programaren aurkezpena egin dute asteon, Eskoriatzako eta Aretxabaletako udaletako ordezkariek, Aretxabaletako skate parke gunean. Hain zuzen ere, 12 eta 17 urte bitarteko nerabeei zuzenduta, aisialdiaz modu dibertigarri eta osasungarrian gozatzeko hainbat jarduera prestatu dituzte asteburura begira, nerabeen artean droga kontsumoa prebenitzeko duela urte batzuk garatu zen egitasmoa abiapuntu izanda.

Ainhoa Cabero Aretxabaletako Kultura zinegotziak, Amaia Murgiondo Partaidetza teknikariak, eta Eskoriatza eta Aretxabaletako udaletako Gazteria teknikari den Maider Etxanizek eman dute proiektuaren xehetasunen berri.

Nerabeen artean droga kontsumoa prebenitzeko duela urte batzuk garatu zen egitasmoan du abiapuntua ekimenak. Ainhoa Cabero zinegotziak azaldu duenez, “nerabeek aisialdia nola bizi duten aztertu zen eta denbora hori modu osasungarriagoan bizitzeko zituzten beharrak identifikatu ziren”.

Aisialdia modu “osasungarriagoan” gozatzea helburu

Ikerketan zehar nerabezaroa trantsizio prozesu gisa, aisialdirako dituzten espazioak, gauak betetzen duen papera, jaiek hartzen duten garrantzia, lagun arteko harremanak, gurasoekin dituzten harremanak, eta substantzien kontsumoa jorratu zituzten, besteak beste.

DBHko lehen mailatik laugarren mailara bitarteko Aretxabaletako eta Eskoriatzako ehun neska-mutil baino gehiagorekin egon ziren. Beraiekin egindako talde dinamiketan ateratako ondorioak oinarri hartuta, aisialdia era osasungarriagoan bizitzeko ekintza batzuk proposatu zituzten. “Horietako asko jaien testuinguruan planteatu ziren, nerabeei bereziki zuzendutako ekintza askorik ez delako egoten euren ustez”, adierazi du Maider Etxaniz Eskoriatzako eta Aretxabaletako Gazteria teknikariak.

Beraz, Bixi programak aisialdia modu “osasungarriagoan” gozatzea du helburu, “nerabeen inplikazio zuzena eta parte-hartzearen bitartez, haien interesei erantzungo dieten ekintzak diseinatzeko”, azpimarratu du Etxanizek.

Nerabeekin batera prestatuta

“Bixi programa ikerketa baten ondorioa da. Nerabeen artean drogen erabileraren gaineko ikerketa bat egin zen, eta batez ere, jai inguru horretan eta aisialdian behar bat zegoela sumatu zen. Gero, nerabeei galdeketa batzuk egin genien, eta erantzuna zenbait ekintza egitea izan zen. Hortik abiatuta jarri dugu martxan Bixi“, adirazi du Ainhoa Cabero, Aretxabaletako kultura zinegotziak.

Parte-hartze prozesu horren ondorioz, nerabeekin batera aisialdiaz hitz egin, eta beraientzat zuzendutako ekintzak antolatzeaz batera, parte-hartzea sustatu nahi dela ere azpimarratu dute. “Ekintzak antolatzerako orduan, eta ekintzetan ere protagonismoa izatea nahi dugu”, adierazi du Maider Etxaniz Aretxabaletako eta Eskoriatzako Gazteria teknikariak.

Skate jaia eta paintaball-a, hurrengo hitzorduak

Lehen ekimenak Sanmigeletako eta Inauterietako jai giroan egin ziren. Pandemiak eragindako geldiaren ondoren, Bixi egitasmoari berriro ekingo diote, hemendik aurrera nolabaiteko erregulartasuna izango duen ekintza-programa batekin. Horrela, lehen hitzordua gaur bertan, hilaren 18an, izango da Aretxabaletako Ibarrako skate parkean. Bertan, 17:00etan hasita skatearen teknikak ezagutzeko aukera egongo da ikastaro baten bidez. Honi jarraituz, lehiaketa egingo dute –izen-emateak 17:30etik aurrera– eta bukatzeko, erakustaldia –19:30ean–.

Gazte bat, Aretxabaletako skate parkean.

Sanmigeletako kultura egitarauaren baitan, irailaren 25erako paintball-ean ibiltzeko arratsalde bat ere proposatu dute Ibarrako berdegunean –16:00etik aurrera–. Izen-ematea taldeka –gehienez zortzi kide– edo banaka egin ahal izango da.

Datozen hilabetetarako aurreikusitako ekintza batzuk:

  • Gaztegauak programa Eskoriatzako gaztelekuan, Bigarren Hezkuntzako hirugarren eta laugarren mailako ikasleentzat. Azarotik aurrera.
  • Dj ikastaroa.
  • Donostiako Laser gunera irteera.
  • Kuadrilen arteko futbol txapelketa.

Bestalde, Bixik badu bere kontua Instagramen aisialdiaz eta denbora libreaz modu osasungarrian gozatzeko aurrera eramango diren ekintzen berri emateko: bixi_aretxabaleta_eskoriatza.

Iturria: Goiena.