Bolintxu Pagasarri mendiaren ekialdeko magalean dagoen erreka labur eta aldapatsua da. Bertan daude Buia eta Seberetxe auzoak, eta baita ere izen bereko jauregia.

XIX. mendearen amaieran urtegi bat eraiki zuten Bolintxuko haranean, gero eta handiagoak ziren Bilbo hiriaren ur beharrak asetzeko. XX. mendearen erdialdera arte erabili zuten, Zadorrako urtegietatik Bilbora ura ekartzeko hodiak eta araztegiak eraiki ziren arte. Geroztik, urtegia lurrez bete da, errekastoaren inguruan baso berri bat hazi da, eta landare eta animalia askoren bizileku den ekosistema txiki bat sortu da.

Dozena erdi bat ibilbide daude Bolintxu errekaren ingurua ezagutzeko. Horietako bat zuzena da. Egokiena da azkar batean ur-jauzia ikustea eta itzultzea bada asmoa. Zailtasun maila txikia du.

Inguruaz gehiago gozatzeko nahikoa denborarekin joanez gero zirkularra den beste ibilbide bat gomendatzen dugu. Buia auzoko aparkalekua ditu abiapuntua eta helmuga. Jolas parkea eta kantxa irekia daude bertan. Kasu honetan ere zailtasun maila txikiko ibilbidea da.

Buia auzoko aparkalekua eta jolas eremuak. (Iturria: Google)

Ibilbide zirkularra

Aipaturiko ibilbide zirkularrak Bolintxubidea du oinarri. Zuzen egin behar da bidean aurrera eta lehenengo bidegurutzean eskumara hartu behar da. Ehun bat metrora bigarren bidegurutze bat dago eta ezkerrera hartu behar da. Bideak gora egiten du apur bat, eta igoera amaitutakoa Bolintxuko haranaren bista ederrak dituen bide zuzena egingo dugu.

Bidean aurrera egin eta hoditeria handi batekin egingo dugu topo. Hori pasatakoan, 700 bat metrora ezkerrera egiten duen bide bat dago (kontuz, ez dago seinaleztatuta. Okerreko bidea hartuz gero Pagasarriko aparkalekura iritsiko zarete). Bidea ondo hartzen baduzu, Bolintxu errekaren mailara jaitsiko zara. Errekaren arrastoa jarraitu besterik ez dago ur-jauzira iristeko.

Itzulerako bidea egiteko bi aukera daude.  Goiko bidea jarraitu edo erreka bazterretik doana. Erreka bazterretik doana politagoa da, baina arriskutsuagoa da ume txikientzako. Zaindu Supersur delakoaren lanak nola doazen. Zati batean bigarren aukera hori ezin zen egin lanak tarteko.

Ur-jauziko argazkia: Julen Landa.