Udazkenean murgilduta, Osakidetzak bronkiolitis akutuaren inguruko xehetasunak argitaratu ditu bere webgunean: aipatutako gaixotasuna zer den, zer sintoma dituen, nola kutsatzen den eta nola prebenitu daitekeen azaldu du Lehem Mailako Arretako Pediatra den Marta Montejok.

Zer da bronkiolitisa?

Bronkiolitisa bi urte baino gutxiagoko haurrek izaten duten arnas infekzioa da. Montejok dioenez, gaixotasunak bronkioko azkenengo parteari eragiten die; zehazki, bronkioloei. Hainbat motatako birusek sor dezakete; hala ere, arnas birus sintzitialek eragiten dute gehien bat. Birus horrek urte osoan zehar zirkulatzen du, baina bereziki, urritik martxora. Horregatik, kasuak urte osoan sor daitezkeen arren, gehienak udazkenean eta neguan gertatzen dira. Pediatrak adierazi du, epidemiak direla.

Zer sintoma ditu?

Hasiera batean, katarro baten sintoma berak ditu: katarroa, mukiak, eztula eta sukarra. Bronkioloak kaltetzen direnean, bizpahiru egunetara, haurrari arnasa hartzea kostatu egiten zaiola nabaritu daiteke, azkarrago arnasten duela, saihets hezurrak nabaritzen zaizkiola, arnastean abdomena mugitzen duela… Bularrean listu hotsa ere entzun dezakegu. Gainera, jateko zailtasunak izaten dituzte eta nekatu egiten dira. Sintomek pare bat aste irauten dute, baina eztulak gehiago ere iraun dezake.

Eztularen, doministikuaren eta objektuen bidez kutsatu daiteke, birusak gorputzetik kanpo zazpi ordu iraun baitezake.

Prebentzio neurriak

  • Urte osoan eta bereziki garai epidemikoan, hotzeria duten haur zaharragoekin edo helduekin ez izatea. Hotzeria arina izan arren, birusaren infekzio foku izan daiteke, eta haurrari bronkiolitisa eragin.
  • Eskuak garbitu: eskuak birusa transmititzeko foku nagusia dira. Eztula edo doministiku egitean, mukiak kentzean edo beste haur bati sudurra garbitzean birusa eskura pasatzen da eta eskuetatik beste haur, heldu edo objektu batengana.
  • Haurrei besaurrea jartzeko esan doministiku edo eztula egitean, eskua jarri ordez. Horrela, birusa kantitate murritzagoan heltzen da eskuetara.
  • Bronkiolitisa diagnostikatzerakoan, haurra ez eman haurtzaindegira.
  • Tabakoaren keak arnasbidean eragin handia du, eta tabakoaren keak bronkiolitisaren sintomak izugarri okertu ditzake. Beraz, tabakoa baztertu.