Osasun neurriengatik urtarrilean eten egin ziren eskola kirolaren baitako lehiak. Orain, baina, apurka-apurka talde eta elkarteak hasi dira martxan, eta Leintz Eskola Kirolak ere, esaterako, larunbatean bertan abiatu zuen lehenengo ekimena; errugbi topaketa egin zuten Arrasateko Mojategin.

Pandemiak denbora luzez eta gogor eragin dio eskola kirolari, baina ikasturte berria –protokoloetara egokitu behar izan diren arren– ohiko entrenamendu eta lehiekin hasi zuten gaztetxoek. Nolanahi ere, seigarren olatuaren eraginez, Gabon jaien ostean, lehiak eteteko agindua eman zuen Osasun Sailak, eta Leintz Eskola Kirolak, esterako, larunbatean berrartu zituen asteburuko jarduerak.

Errugbi topaketa egin zuten neska-mutikoek, eta Julen Aranbarri LEKeko arduradunetako batek azaldu zuen, eguraldia makur samarra izan arren, “gustura” aritu zirela. “Astean zehar egindako lana plazaratzeko eta gainerakoekin harremanak estutzeko balio izaten dute asteburuetako jarduerek. Gozatzeko eta osasuntsu egoteko modua bat da”.

Iturria: Goiena.eus.