Herrietako jaietan ezinbestekoak diren buruhandiak artelan bilakatu daitezkeela erakusten du David Tavares artista gasteiztarrak Burugabekeriak izeneko bildumarekin. Lanak Aretxabaletako Arkupe kultur etxean daude ikusgai hilaren 30era arte, eta azken urte eta erdian egindako kartoizko buruhandi, maskara eta panpinak elkartzen dira bertan. Erakusketa publiko guztiei zuzenduta egon arren, bereziki umeentzat eginda dago.

Captura de pantalla 2016-04-08 a las 12.42.41

Erakusketa dinamikoa
Artelanak erakusteaz gain, umeek haiekin jolasteko eta gozatzeko aukera dute erakusketan. Bertaratzen direnek buruhandiak soinean jarri eta argazkiak ateratzeko aukera dute, horretarako ezarritako photocall-ean. “Ikusleei une batez buruhandi bilakatzeko aukera eskaini nahi nien, pertsonaia arraro hauen tripak ikusteko”, adierazi du Tavaresek.

Esperientzia borobiltzeko, buruhandiei bizia eman eta umeei korrikaldi batzuk egiteko aukera eman die. Hala, nahiz eta herrian inongo jaiegunik ez izan, buruhandiak gora eta behera dabiltza egunotan Aretxabaletako plazan.

Hasierak
Semearentzat kartoizko figura txikiak egiten zebilela piztu zitzaion afizioa, eta handik gutxira egin zuen lehen buruhandia. “Paperarekin eta kartoiarekin lan egitea oso dibertigarria da, eta birziklagarria eta merkea ere bai”.

Erakusketan ikus daitezkeen lanetako batzuk bere auzoko fruta-dendek eta beste hainbat dendak botatako kartoi eta egunkari zaharrekin eginak daude. Bada, pixkanaka, sakontzen joan zen, buruhandi sofistikatuagoak lortzeko asmoz, eta ikastaro bat egin zuen 2014an Navatako Ventura & Hosta erraldoi eta buruhandien tailerrean (Girona).