Umeek oso gustuko dute eskulanak egitea eta zorionez aukera zabala dago esparru horretan. Horietako bat buztingintza izan daiteke.

Eskoriatzako Zubiate labean astero egiten dute tailerra; bai neska-mutikoentzako bai helduentzako; izan ere, hainbat dira buztingintzaren bitartez pertsona orok lantzen dituen gaitasunak.

Batzuentzako trebezia artistikoari bide emateko aukera izan daiteke, eta beste batzuentzako irudimena, motrizitate fina edo marrazketa lantzeko abagunea. Ez dira gutxi buztingintza eguneroko gurpil zorotik ateratzeko eta lasaitzeko erabiltzen dutenak ere. 

Eskoriatzako tailerreko dinamizatzaile Alvaro Gartziak azaldu du bere tailerrean bakoitzak nahi duena egiten duela. “Teknika errazarekin hasten gara eta poliki-poliki gero eta gauza zailagoak ikasten joaten gara”.

Ariketa asko egin behar dira lanean hasi aurretik. Lehenengo eta behin zer egin erabaki eta nola egin erabaki behar da. “Gero labean egosi, lixatu, margotu, distira emateko produktua gehitu… prozesuan piezaren bat apurtzen bada ere konponbidea eman behar zaio arazoari”, azaltzen du.

Platerak, ontziak, askotariko apaingarriak, loreontziak… egiten dituzte Eskoriatzan. Guztia elkar lagunduz, elkarrengandik ikasiz eta burua erabiliz.

20029617