Euskal Herriko eskolek Googleren zerbitzuak modu orokorrean erabiltzen jarraitzen duten bitartean, Danimarka zerbitzu horiek murrizteko bidean da. Datuak babesteko Danimarkako agintaritzak (Datatilsysnet) jakin du AEBetako teknologia-enpresa erraldoiak ikasleen datuak erabiltzeak urratu egiten duela pribatutasunari buruzko Europako legea.

Asteazkenean bidalitako ohar batean, Danimarkako agintaritzak adierazi zuen Googlek ez duela “bere helburuetarako” Chromebook ordenagailu eramangarriarekin eta Google Workplace for Education ikaskuntza-zerbitzuarekin eskolako lanak egiten dituzten ikasleen datuak ateratzeko eta erabiltzeko legezko oinarririk.

Orain arte, Googlek ikasleen datuak erabili ditu errendimendua neurtzeko eta funtzio berriak garatzeko –horietako batzuk adimen artifizialean (IA) oinarrituak– bere hezkuntza-plataformarako, baina baita Chrome nabigatzailerako eta bere sistema eragilerako ere. Datatilsysnet-en interpretazioa da erabilera horrek legedia urratzen duela, ez baitu bermatzen haurren pribatutasuna.

Agintaritzak datuak erabiltzeko aukera ematen du zerbitzuak emateko, segurtasuna hobetzeko, komunikazioa errazteko eta legezko betebeharrak betetzeko.

Ebazpenean, agintariek adierazi dute Danimarkako hiriek ez zutela behar bezain lan zehatza egin Googleren produktuek tokiko ikastetxeetan erabiltzeko baimena eman aurretik duten arriskua zehazteko. Ondorioz, herrialdeko 53 udalerriri agindu die praktikak doitzeko, ikasleen datuak Googlera transferitzeari uzteko edo oinarri juridiko bat lortzeko, eta konpainia legez kanpoko erabilera horretatik abstenitzen dela bermatzeko.

Udalek martxoaren 1era arte dute erabakia nola beteko duten azaltzeko. Abuztuaren 1etik aurrera, erabat debekatuko da datuak baimenik gabe erabiltzea. Murrizketa horrek ez du zuzenean Chromebook-en debekurik eragiten, baina muga garrantzitsuak ezartzen ditu. Googlek bere metodoak alda ditzake datuak babesteko Europako legera egokitzeko. Hori egin ezean, ordenagailu horiek Danimarkako eskoletatik desagerraraz litezke pixkanaka.