Bizitzak erdigunean jartzearen balioa. Zaintza, autoestima pertsonala (baina kolektiboa), indarra, potentzia, xarma eta bizitzen ari diren momentua berriro errepikatuko ez denaren sentsazioa. Berba horien guztien artean mugitzen da nerabea bere mundu paregabean.

Sexologiaren arloan ere, antzerako hitzak erabiltzen dira norberaren gorputzaren desio eta erotikaren inguruan hitz egiten denean. Bizitzaren momentuko balioa erdigunean jarri, eta norberaren zaintza kontutan hartuta, desioaren orientazioa eta erotika gozatzea: aukera posible guztiak aintzat hartuta.

Baina, ezagutzen ditugu aukerak? Ematen al dizkiegu nerabeei beraien desio eta erotikaren inguruan hitz egiteko espazioak? Kontutan hartzen dugu esaten digutena? Balioan jartzen dugu ez izendatzearen garrantzia?

Hala, ariketa bat proposatzen dizuegu nerabeek eta nik irakurtzen ari zareten pertsona orori: itxi begiak, gogoratu 15 edo 16 bat urterekin zuen gorputzak zeukan formarekin. Galdetuiozu zeure buruari: Zer egiten nuen nire sabel barruan mugitzen ziren tximeletatxoak identifikatzeko? Desioa ulertzeko? Desiratzeko? Desioa sentitzen nuen?

– Guzti honetaz ez gogoratzea, aukera bat izan daiteke. Gorputzaren memoriarekin konektatzea batzuetan zaila izaten da. Bertan gertatzen diren prozesuei garrantzirik ematen ez diogunean gertatzen dira horrelako “ahazteak”-.

Gogoratzen al duzu zer nolakoa izan zen zure gorputzarekin izandako harremana? Nerabeek gogoratzen dute; eta badakite, beraiek sentitzen duten hori errepikaezina izango dela, pasioz eta indarrez maitatzen (edo ez) izaten dituztela harreman afektiboak. Beraien erotikarekin ere, horrela egiten dute; 5 zentzumenen bitartez ezagutu. Horretarako, aldakorrak izan behar dira, informazioa lortu behar dute, beraien gorputzarekin konektatzeko pista jolasean jolastu behar dute.

Badakite noiz den beraien gorputzarekin harremanak izateko unea. Erraz identifikatzen dute beraien goxotasunean egin nahi dutena, baina batzuetan beste gorputz batekin edo batzuekin elkartzen dira: informazio bila. Esperientziak konpartitzen dituzte eta batez ere erreferente berriak dituzte: desioaren eta erotikaren inguruan hitz egiten dietenak. Batzuk, erreferente positiboak, beste batzuk (ez hain positiboak). Baina ezagutzen ditugu erreferente horiek?

Behar bada, ezagutu nahi dituzue eta momentu honetan, zuen eztarrietan korapilo bat sortu da; guk proposatutako galdera guztiei erantzuna ematea zaila egiten zaizuelako. (Lasai, hurrengorako itxiko dugu hau).

Agian, benetan, nerabezaroan desioa eta erotika zer den jakiteaz zientzia besterik egin ez delako izan daiteke. Edo agian, egi eta teoria absolutuak sortu direlako bakarrik, horrek nerabea bera (zein edozein pertsona) mugatu dezakeenaren ideia ulertu barik. Unibertsaltasuna sortzean, teoria horren baitan kokatu ezin direnak kanpoan geratzen baitira.

Desioan eta erotikan berdina gertatzen da.

Honen aurrean, aldarrikatu ditzagun gure desioak modu askean konpartitzeko espazioak, entzun gaitezen eta batez ere xaxatu dezagun jendea. Deserosotasuna sortu dezagun (horrelako gaiek sortzen dituzten momentu deserosoak), isiluneak, hausnarketak eta batez ere, ulertu gaitezen. Baina, egin dezagun modu kolektiboan!

Mila esker gaztetxokoko nerabe guztiei! Zuen mundua zabaltzeagatik eta batez ere, modu askean zuen gorputzen dantza erakusteagatik!