San Juan de Dios ospitaleak eta Aretxabaletako UDA kirol taldeak bigarren urtea dute elkarlanean. Adin tarte ezberdinetako jokalarien marihuana kontsumoarekin kezkatuta gaia adarretatik heltzea erabaki zuten kirol taldean eta erantzun positiboa jaso zuen ospitaletik. Iaz neska-mutikoekin egin zuten lan eta aurten gurasoen txanda izango da. Gaur gaurkoz kontsumo ohitura gainditzeko laguntza eskatu dute zortzi lagunek.

Ospitale psikiatrikoa da San Juan da Dios eta UDAk datuak jasotzeko aukera eman zion. Hala, inkestak egin zituzten eta emaitza da 13 eta 16 urte bitarteko gazteen %30 inguruk marihuana kontsumitzen duela.

“Badakigu gizartean asko kontsumitzen dela, baina jakin nahi duguna da zergatik kontsumitzen den edo zergatik hartzen den kontsumitzeko erabakia”, adierazi du ospitaleko erizain Olaia Arresek. “Uste dugu hori landuz jaitsiko dugula kontsumoa”.

Zergatik marihuana

Marihuanaren kontsumoan zentratu dute ikerketa gaixoekin izandako esperientziaren arabera bestelako droga batzuetarako abiapuntua delako. “Izaten da tabakoa, alkohola eta marihuana, eta hortik bestelako drogetarako saltoa ematen dute. Ikerketan jaso ditugun datuen arabera ez dago kontsumitzaile bat bera ere pasa denik bestelako droga batera marihuana kontsumitu gabe. Horregatik hartzen dugu erreferentzia moduan marihuana”, azaldu du Arresek.

Gizarteak gaiak duen garrantziaz jabetu behar duela uste dute bai ospitaleko arduradunek bai UDA kirol taldeko ordezkariek. “Kontziente gara baina gai tabua da. Gure helburua, hain zuzen ere, tabua den gaia gizarteratzea da”, azaldu du UDAko presidente Agurtzane Elkorok. “Argi dugu arazoa gizartearena dela. Gure nerabeek ez dute kulparik. Hemen kontua da nagusiok zer nolako gizartea sortu dugun eta zer nolako gizartea dugun”.

Gurasoen inplikazioa konponbiderako

Gizarte garbi baten alde lan egin beharra dagoela uste du Elkorok. Arresek gaineratzen du arazo nagusiena gaiari ematen zaion normaltasuna dela. “Normalizazio hori ez dute nerabeek sortu eta egongo ez balitz nerabeek ere ez lukete horrela ikusiko. Hala, nerabeek ez dute inolako arriskurik ikusten kontsumoan. Ez dituzte ikusten marihuanaren kontsumoak ekar ditzakeen ondorioak”.

Hiru urteko proiektu moduan jaio zen egitasmoa. Iaz neska-mutikoekin egin zuten lan eta aurten gurasoekin egingo dute lanketa. Datorren urtean ingurunea izango dute jomuga. “Lanketa honek emaitzak izateko gurasoek bai edo bai parte hartu behar dute”, azaldu du Arresek.

Askotariko saioak egingo dituzte gurasoekin San Juan de Dios ospitaletik: kasu errealak aztertu, talde dinamikak egin, ospitaleko gaixoen esperientziak ezagutu… UDA kirol taldetik, berriz, kirola egiteko proposamena luzatuko dute. “Gurasoak ere kirola egitera gonbidatuko ditugu. Kirola bada erreminta eta neska-mutikoek egiten badute gurasoak ere eredu izan behar dira eta kirola egiten jarri nahi ditugu”, esan du Elkorok.

Saio bateratuek emaitza interesgarriak

Aurreko urtean saio bateratu ugari egin dituzte eta oso emaitza interesgarriak eman dituztela adierazi dute Elkorok eta Arresek. “Elkartu ditugu neska-mutikoak, ospitaleko arduradunak, ospitaleko gaixoak, UDAko hezitzaileak eta gurasoak. Ez gabiltza esaten ez erretzeko. Gabiltza esaten kontsumitzeak zein ondorio dituen”.

San Juan de Dios ospitaleko erizain Olaia Arresek azaltzen du ez dutela bakarrik kontsumoaren prebentzioa egiten baizik eta baita ere autoestimuarena eta asertibitatearena. “Adin bakoitzari egokitutako saioak egiten ditugu eta dinamikak aldatu egiten dira. Gazteak, entrenatzaileak, hezitzaileak, gurasoak, gaixoak… denak elkartzea eta gaiari buruz hitz egitea oso interesgarria izan da”.