Gonbidatu berezi asko izango ditu Bizipoza Jaiak eta egitaraua guztiz itxita ez badago ere egun osokoa izango da. Bizipoza Jaiaren berri emateko elkartu dira elkarteko kide Leire Elizegi eta Markel Oiarzabal, Hernaniko alkate Xabier Lertxundi, Hernaniko hezkuntza eta euskara zinegotzi Axier Mingo eta Pausoka elkarteko Amaia Irazusta zein Super H elkarteko Joseba Labaka.

Bizipoza elkarteko Leire Elizegik Bizipoza Jaiaren helburuen berri eman du: “Bizipoza elkarteak
gaur egun, Euskal Herri osoko 38 elkartez osatutako elkartea da. Denak, izaera bereziko gaiak
lantzen dituztenak, eta haur eta familiek osatutakoak, hain zuzen. Eta Bizipozaren helburua da
denona eta denontzat beharko lukeen gizarte inklusibo bat eraikitzea, euskaratik eta euskaraz.
Horretarako Bizipozaren helburu bada elkarte guzti hauek egunerokoan egiten duten lan hori,
eta euren errealitatea gizarteratzea eta eragitea” . Oinarri nagusiak zeintzuk diren ere zerrendatu du : “Euskara, elkartasuna, bizipoza eta auzolana”.

Jaia Hernanin antolatzearen arrazoia ere eman ditu, eta Joxe Mari Auzmendi ekarri du
gogora: “Joxe Mari Auzmendi, Bizipozako talde eragileko kidea zen, eta Hernanin egingo dugu
ekitaldia, bera bizi zen herria babesgune hartuz. Beraz gogotsu eta irrikaz gaude”.

Antolaketa buruz aritu da Markel Oiarzabalek: “Urtero herri ezberdin
batean ospatzen dugu Bizipoza Jaia eta aurten zortea izan dugu Hernanin izango delako.
Bizipozaren Jai honetan, elkarteak izango dira protagonista, baina egin dugu saiakera bat
hernaniarron jaia ere izateko. Horregatik, hasieratik bildu gara herriko ikastetxeekin, kirol
federatuko kideekin, herriko eragile ezberdinekin… Eta esan beharra dugu jaso dugun
erantzuna izan dela oso baikorra. Zentzu horretan oso eskertuta eta oso pozik gaude”.

Egitarau ‘potoloa’

Egitarau ‘«’potoloa’ prestatu dute apirilaren 27rako. “Egun osoan izango dira ekintzak. Hainbat eremu erabiliko ditugu horretarako; lehenengo eremua izango da elkarteen gunea, eta bertan herritarrek aukera izango dute elkartea aurrez aurre ezagutzeko, besteak beste. Jan edana ez da faltako txosnan. Horrez gain, ikuskizunen gunea ere izango dugu, eta gonbidatu bereziak izango dira. Besteak beste izango ditugu Ttarla dantza taldeko kideak, Porrotx eta Marimototsek ere ikuskizuna eskainiko dute, eta Hernaniko Herburu erraldoi eta buruhandien konpartsakoak ere bertan izango ditugu. Parte hartzailea den gune bat ere osatu dugu, tailerren gunea deitu diogu. Familia guztiak parte hartzeko aukera izango du bertan, noski. Tartean izango da Kanika Aisialdi taldea”»”.

Iturri askotatik edan duen jaialdia izango dela aurreratu du Oiarzabalek: “Osotasunean denak bat egingo du apirilaren 27an, Hernanin”.

Sentsibilizazio kanpaina

Jaialdiaz gain, sentsibilizazio kanpaina bat egin dutela ere azaldu du Oiarzabalek: “Ez dugu
jaialdira bakarrik mugatu Bizipoza Jaia, eta horretarako lehenagotik lanketa bat eskaini nahi
zian diogu. Horretarako, Bizipoza Elkarteko kidea den Nerea Godoy herriko eskola guztietako
irakasleekin bildu da, Bizipoza eskola zer den azaltzeko, elkartearen filosofia azaltzeko eta
horrekin batera, haurrekin saioak eskaini dituzte Porrotxek eta Zapotxinek, guztira bost. Pailazo
eta haurren arteko hizkuntzan, hitz egin dute zer den Bizipoza”.

Boluntarioak behar dira

Amaitzeko, laguntza ongi etorria dela aitortu dute, eta boluntarioak ere behar direla
adierazi du Markel Oiarzabalek. “Izan dugun prestutasuna harrotasunez begiratzen dugu.
Hernaniar bezala harrotasunez hartu dugu, jaso dugu nahikoa, baina gehiago jasoko dugu.
Oholtza beheko lana ere beharrezkoa da eta banakoak ongi etorriak izango dira.
markel@bizipoza.eus helbidean lortu dezakete informazioa eta kafe bat hartu nahi duenak ere
aukera izango du. 688 733 696 telefono zenbakian ere jarri daiteke gurekin kontaktuan laguntza
eskaintzeko”.