Haurrak bereziki babestuta egon behar dute eguzkiaren esposiziotik eta eguneko ordu zentraletan haurra eguzkitan egotea ekidituko dugu. Ahal den heinean, itzaletan egoten ahaleginduko gara eta pixkanaka gehitzen joango gara eguzkitan igaroko dugun denbora. Aholku horiek eman dizkigu Leire Azpiazu erizainak.

Beste gomendio hauek ere egin dizkigu: “Eguzkitako betaurreko eta biserak erabiliko ditugu eta eguzkitan gaudenean arropa erabiliko dugu gorputza gehiago babestuta izateko”.

Azkenik, eguzkitako kremak erabili beharko ditugula gogorarazi du, sei hilabetetik aurrerako haurretan. Izan ere, ez da gomendatzen adin horretatik beherakoetan krema horiek erabiltzea, eta beraz, eguzkitan egotea saihesteaz gain, beste neurri batzuk hartuko ditugula adierazi du. Esaterako, fisikoak direnak; itzaletan egotea, arropa jantzita, eta abar.

Erabiliko dugun eguzki-krema 30 edo 50 FPS-koa izan beharko dela azpimarratu du Azpiazuk. UVAren aurkako babesa daukala ziurtatuko gara, horretarako, kremaren etiketan duen informazioan begiratuta. Bestalde, urarekiko erresistentzia dutenak aukeratuko ditugula ere gaineratu du.

Eguzkiaren esposizioa baino 15 edo 30 minutu lehenago ematea gomendatzen dute adituek eta bi orduero errepikatzea, izerdi eta urarekin bere babesa murriztu egiten delako.