EKKO izeneko prebentzio proiektua prestatu dute hainbat eragilek elkarlanean Aretxabaletan eta Eskoriatzan. Zuzenduta dago LH5 eta LH6ko haurrei eta haien gurasoei eta abiatzen da orain hiru urte nerabeen substantzien kontsumoaren inguruan egindako azterketatik.

Helburua prebentzioa da eta gizarte trebetasunak lantzea du helburu. Hau da, haurrek nerabe direnean erabaki zuzenak har ditzaten irakastea. Hala, eskola, kirola, komunitatea eta osasuna batzen ditu.

Proiektuak 2018-2019 ikasturtean izan zuen abiapuntua. Orduan, nerabeen sustantzien kontsumoaren inguruko ikerketa egin zen. Ikerketa horren ondorioak kezkagarriak izan ziren: antzeman zen DBH1etik DBH4ra bitartean igoera handia ematen dela sustantzien kontsumoan, eta horrez gain, asertibitate, kontsumoaren gaineko arriskuen pertzepzio, erabakiak hartzeko trebetasun maila nahiz talde presioari aurre egiteko erresistentzia oso baxua dutela nerabeek.

Ordutik hiru urte pasa dira, eta denbora horretan Arrasateko San Juan de Dios Ospitalea lanean dabil DBH-ko ikasleekin. Sustantzien kontsumoa zerbait jaistea lortu den arren, beste hainbat arazo ere badaudela ikusi dute: antsietatea, elikadura nahasmenak, tekno-adikzioak…

EKKO egitasmoa datorren urtetik aurrera jarriko dute martxan. Asmoa da UDA edo Aretxabaleta Kirol Elkartean, Leintz Eskola Kirolean, Eskoriatza Kirol Elkartean eta Aretxabaletako eta Eskoriatzako ludoteketan eskaintzea, 2022ko urtarriletik aurrera.

Familiak dira lanaren ardatz

Prebentzio-lana nerabezaroaren aurretik egin beharrekoa dela ondorioztatu dute orain arte lanean jardun dutenek: “DBH-ra iristen direnerako hainbat erabaki hartuak dituztelako”. Hala, haurren eta nerabeen ongizatea hobetuko duen programa garatu gura dute, eskola, komunitatea, kirola eta osasuna batuta. Landuko dituzten alderdiak dira, besteak beste: autoestimua, komunikazioa, erabakiak hartzea, gatazken kudeaketa eta elkarreragin pertsonala.

Familiak izango dira lanaren ardatz; horregatik, haurrek trebetasun-sozialak landu behar dituztenean, bertan egoteko eskatuko diete gurasoei, eta zenbait ekintza partekatu egingo dituzte. Horrez gain, gurasoei bideratutako saioak ere izango dira, umeen bidelagun izan daitezen. Kirol elkartetan ez ezik ludoteka bidez ere egingo dute lan; kirola egitera animatuko dituzte, eta kirol jarduera ez konpetitiboak sustatu.

Bi urteko prozesua amaitzean neurtuko dute emaitza.