Gazteak zientzia eta teknologiara gerturatzeko liburu-bilduma aurkeztu dute Elhuyarrek eta Gipuzkoako Foru Aldundiak. Adierazi dutenez, hiru liburuxkaz osatutako bilduma Euskal Herriko hainbat enpresa eta erakundetako profesionalen elkarlanaren emaitza da.

Talentua eta ikaskuntza bultzatzeko Aldundiaren dirulaguntza deialdian aukeratutako proiektua da izan da Elhuyarrek aurrera eraman duena, eta Jon Abril Elhuyarreko zuzendari nagusiak azaldu duenez, iaz hasi ziren lanean: “2019ko otsailean abiatu zen prozesua eta hainbat profiletako enpresa eta erakundeetako profesional bildu ginen:  irakasleak, ikertzaileak, garapen-agentzietako kideak, berrikuntzarako eragileak, ikerketa-zentroetako kideak, zientzia-dibulgatzaileak, gazteen aisialdiko eragileak…”.

Abrilek azaldu du bildumaren helburua gazteak STEM lanbideetara (Zientzia, Teknologia, Ingeniaritza eta Matematika) gerturatzea dela. Baina horretarako baliabideak eskaintzea ezinbestekoa dela uste du, eta adierazi du bizipenak ere “garrantzitsuak” direla etorkizunera begirako asmoetan: “Ezinbestekoa da zientzia- eta teknologia-sare osoaren parte-hartzea eta konpromisoa, eta, orobat, asmo horietara begira lan egiteko metodologiak eta ezagutzak garatzea”. Aurkeztu diren liburuxketan, alde batetik, “adibide errealak” eta “rol-ereduak” mahai-gaineratzen dituzte eta bestetik, STEM profesioekin lotutako jarduera ahalik eta modu errealenean islatzen ahalegindu dira; irakurle gazteak protagonista bilakatzen direlarik.

Libruak deskargatzea, doan

Esan bezala hiru dira liburuak. STEAM hezkuntza eta STEM profesioak gazteak inspiratzeko da bat. Bertan, STEAM hezkuntza-ereduaren  gakoak biltzen dira; besteak beste, XXI. menderako konpetentziak edota  diziplina horietan emakumeen duten papera.

STEAM proiektuak egiteko IDEIAK, gazteak inspiratzeko da bigarrena, eta  gazteek zientzia- eta teknologia-proiektuak egiteko tresnak, ideiak, azalpenak eta baliabideak bildu dituzte.

Bukatzeko, STEM profesionalak gazteak inspiratzeko liburuxkan, STEAM hezkuntzaren proposamenean STEM profesionalen figuraz jardun dute: “Aztertu da eredu horiek nola eraikitzen ditugun edo nola eraiki beharko genituzkeen. Gazteen etorkizunerako asmo profesionaletan zerk eragiten duen aurkezten da, eta gazteen eta profesionalen arteko topaketak bideratzeko lanean ari garen eragileen arteko hausnarketa eta praktika eredugarrien aurkezpena egiten da”.

Pernan Goñiren ilustrazioez eta azalpen-testuez osatuta daude liburuxkak, eta webgunean daude eskuragarri, doan deskargatzeko.

Datu kezkagarriak STEM alorrean

Eustaten arabera, lau urtean, %16,6 jaitsi da STEM ikasketetan matrikulatu den ikasleen zenbatekoa, EAEn. Eta datua are kezkagarriagoa da emakumezkoen kasuan: %9 dira STEM adarrak aukeratzen dituzten neskak.

Datu horiei erreparatuta, Aldundiko bozeramaile Imanol Lasak adierazi du STEM profesionalen eskaria haziz doala, eta hortaz, matrikulatzeak ez datozela arlo profesionaleko “errealitatearekin bat “: “Azken bi urteotan, Lanbide Heziketatik etorritako STEM profilen enpresa-eskaria % 56 hazi da, eta unibertsitate-profilena, berriz, % 25.

Bestetik, Lasak gehitu du etorkizuneko lanpostuen % 80an beharrezkoak izango direla STEAM konpetentziak. “Ez dakigu nolakoa izango den mundua hemendik hamarkada batzuetara, baina jakin badakigu zientziari eta teknologiari lotutako ezagutzak eta gaitasunak ezinbestekoak izango direla sektore ekonomiko guztietan, eta gizartearen erronka berriei erantzuteko, esan du”.

Etiketak: