“Menpekotasunaz eta gehiegizko erabileraz jardungo dugu. Izan ere, menpekotasun hori areagotzeko zenbait mekanismo erabiltzen dituzte bideo-jokoek eta zenbait aplikaziok”

Emoki elkarteko Ainhoa Arruabarrenarekin hitz egin dugu Bideo-jokoen, Interneten eta sare sozialen erabileraren inguruan.

“Mugak jartzearen ardura gurasoena da. Txikiak direnetik –6 edo 7 urtetatik– erakutsi behar zaie kudeatzen; izan ere, DBHra iristean zailago da”, argitu du. Mugikorrak, ez daudela adikzio gisa jasota ere badio; bai ordea bideo-jokoak. “Sare Sozialen kasua, oso zabaldua dago gizartean gazte zein helduen artean. Berez ez dago gaitz gisa jasoa. Baina, kontrolpetik irteten denean eta egunerokotasunean eragin negatiboa badu, arazoa badagoela ikus dezakegu. Bideo-jokoetan, aldiz, muturreko kasuak azaleratzen dira: etxetik ez irtetea, higiene falta, harremanak izateko arazoak…”. Emokik, egunean, bi ordu baino gehiago pantaila aurrean ez igarotzea aholkatzen du. “Zaila da bizi garen gizarte honetan, baina gehienez bi ordu eman beharko genituzke orotara”.