Oso urrutira joan gabe elurra dugu Euskal Herriko hainbat txokotan. Elurra esperientzia guztiz berezia da haurtzaroan. Ez galdu aukera eta egin jolasean elurrarekin.

Elurretan oinatzak gelditzen dira. Elurrak betiko paisaiak guztiz itxuraldatzen ditu. Bai, hatz eta sudur punta izoztuak ere eragiten ditu, baina aurkikuntza handia da haurrentzat. Zergatik?

Elurrak sakon eraldatzen ditu gure pertzepzioak. Elurtutako guneetako isiltasuna, estalita gelditzen diren koloreak… Eta elur zuriak kontrastez, formak eta koloreak nabarmentzen ditu elur zuriak.

Ukitu, dastatu, eraiki, desegin…

Haur batek ezin dio eutsi elurra ukitzeari, eta zenbait kasutan dastatzeari ere ez. Egia da, baita ere, ez duela luzarorako den hotz-sentsazioa atsegin; izan ere, elurra mingarra izan daiteke. Horregatik, elurra bikaina da haurrak ere bere burua zaintzen ikasteko. Kontuz baina, heldua orkatiletaraino sartzen den lekuan belaunetaraino sartzen baita haurra!

Materia oso berezia da elurra, eta ez-ohikoa haur gehienentzako. Hala, gainditu beharreko zailtasun berriak suposatzen ditu. Elurra hotza da, bustia da, eta elur handia badago kosta egiten da pausoak ematea… Baina elurra manipulatu egin daiteke, irrist egin daiteke erraz, elurretako panpinak edo elur-bolak egiteko balio du… Jolas eta barre egiteko aukera handiak ematen ditu, eta baita ere eraikuntzarako aukera handiak.

Elurra, bestetik, joan egin daiteke. Dagoen bitartean bonbon, badoanean hor korpon… Hori ere ikasgai polita da umeentzat.

Eta zientzia ere bada elurra… elurra ura bihurtzen da. Nora doa? Zergatik doa?

Gozatu elurrarekin eta gozatu umeekin!

Argazkia: Etolane