Saharar herriaren erbesteratzearen 50. urteurrena betetzen den honetan, Saharako Errefuxiatuen kanpamenduetatik eman diote hasiera kanpainari, Tindufen. Bertan, besteak beste, Oporrak Bakean lantaldeko kideak, haur sahararrak, elkarte desberdinetako kideak, harrera familiak eta saharar haurren familiak bildu dira. “Aurten, 2026ko Oporrak Bakean ekimenari hemendik bertatik, kanpamenduetatik alegia, hasiera ematea garrantzitsua dela iruditu zaigu”, azaldu dute.” Hemen daude udan gure etxeetan jasoko ditugun umeak, hemen daude euren seme-alabak Euskal Herrira etor daitezen baimena ematen duten familia biologikoak, eta hemen dago, momentuz, euren bizilekua. Lekua baino deslekua dena. Desertua”.

Kanpaina zabalik urtarrilaren 15era arte

Aurtengo kanpainaren leloa da 50 urtez gure ateak zabalik eta martxan egongo da izen-ematea urtarrilaren 15era arte. “Deia luzatzen dugu gure etxeetan uztailean eta abuztuan ume saharar bat etxean har dezagun. Erakunde eta eragile asko ditugu gure alde, eta bidelagun eta ardura izan arren erantzukizuna kolektiboa da. Zu ere zure etxeko ateak zabaltzera gonbidatzen zaitugu”.

“Zu ere harrera-familia izatera deitzen zaitugu”

Oporrak Bakean programan parte hartzeak aberastu egiten dituela azpimarratu dute. “Elkartasun keinu honetan guztiok ateratzen gara desberdin, gugandik asko ikasten duten arren guk eurengandik ere jasotzen duguna asko delako”, esan dute. “Haur sahararrak gure etxe eta familietan hartzeak euren osasunerako duen garrantzia ukaezina da. Errefuxiatu sahararren bizi-baldintzak nazioarteko laguntza humanitarioaren eta gero eta larriagoak diren muturreko klima-baldintzen menpe daude eta Oporrak Bakean programan parte hartzea arnas gune bihurtzen da bai parte hartzen duten adin txikiko umeentzat bai haien familientzat ere”.