Enrike Martinez Lozano: “Barnetasuna eskoletan lantzeak iraultza ekarriko du hezkuntzara”
Haurrak euren dimentsio sakonenarekin harremanetan jartzeko eta nork bere burua ezagutzeko, hezkuntza eredu berria proposatzen du Martinez Lozanok.
Enrique Martinez Lozano psikoterapeuta, soziologo eta teologoa Debagoienean izan zen joan den astean. Ostegunean Barnetasunean hezi: zergatik eta nola egin hitzaldia eskaini zuen Arizmendi ikastolan, ostiralean Eskoriatzako HUHEZIn, eta asteburuan, berriz, Arantzazun izan zen.
Psikologia eta espiritualtasuna uztartuz, norberak bere burua hobeto ezagutzea sustatuko duen hezkuntza eredua proposatzen du Martinez Lozanok.
Ezer baino lehen, nola definituko zenuke barnetasuna?
Gizakiok hiru dimentsio ditugu gure baitan. Lehena, eta azalekoena, fisikoa da: gorputza. Barrenera begiratuta, psikismoa izango genuke, eta hortik datozkigu, esaterako, onartua eta maitatua izateko beharrak. Baina bada sakonagoa den hirugarren dimentsio bat ere, espiritualtasunari lotua, bizitzaren zentzua, zoriona eta barne bakea bilatzen dituena. Azken dimentsio horri egiten dio erreferentzia barnetasunak.
Nola aplikatzen da hezkuntzara?
Gizakiaren beste dimentsioak lantzen diren bezala, barnetasuna ere irakatsi egin behar da ikastetxeetan. Haurrek ikasi behar dute euren zatirik sakonenarekin kontaktatzen, horren kontzientzia garatu, eta gerora, barne hazkuntza integrala izan dezaten.
Egungo hezkuntza ereduaren baitan, posible al da barnetasunaren lanketa txertatzea?
Egia esan, ez da erraza. Hezkuntza sistemaren diseinuak adimena du ardatz eta burua ezagutzaz bete beharreko kutxa gisa hartzen du. Barnetasunak, berriz, norbera indartu eta ezagutzeko aukera ematen du, eta hura eskoletan lantzeak iraultza ekarriko du hezkuntzara. Izan ere, bizitza bera ikuspegi berri batetik ikustea dakarren heinean, ikasketa metodologien eta hezkuntzaren eraldaketa suposatuko luke. Ikastetxeak egungo sistemaren menpe daude, guztiz, baina gutxi batzuetan hasi dira esperientzia interesgarriak sortzen.
Adibidez?
Gasteizko Vera-Cruz ikastetxean hamar urteko esperientzia dute, eta adin guztietako haurrekin landu dute dagoeneko. Jasotako emaitza onak ikusita, bertako irakasle eszeptikoenak ere konbentzitu dituzte. Arrasateko Arizmendi ikastolan ere oso proiektu interesgarria dute esku artean
Etorkizunera begira, zer?
Espiritualtasun hitzak gaitzespena sortzen du automatikoki jende askorengan, baina badut barnetasunaren lanketa gehiago zabaltzeko itxaropena, ikerketa asko egiten ari baitira horren bueltan, eta behin frogak izanda, jendartearen onarpena ere etorriko baita.