Erditze ostean forma berreskuratzeko aholkuak

Haurdunaldia eta erditzea mugarri oso garrantzitsua da emakumeentzako. Gorputzak egiturazko aldaketa asko izaten ditu, eta normaltasunera itzultzeko jardun eta arreta bereziak eskaini behar zaizkio.

Junkal Zubizarreta Bergarako Agorrosin ekintza guneko kirol aholkularitza zerbitzuko kidea da, eta Erdigu genuen/dugunontzako ikastaroa gidatzen du. Zortzi saio dira eta erditze osteko edukiak lantzen dituzte bertan. Eduki horiek gimnasia hipropesiboak, gerri-gihartzaren lanketak eta zoru pelbikoaren tonifikazioaren inguruan dira.

Emakumeek, gero eta sarriago, fisioterapia zentro pribatuetara jotzen dute haurdunaldian eta erditze ostean sortutako arazoei konponbidea aurkitzeko. Arazo horiek bereziki gerri eta sabelaldean ematen direla azaltzen digu Zubizarretak. “Sabeleko giharrak gehiegizko laxatze bat izan ohi dute eta zoru pelbikoak, bereziki, perineoko egiturek behera egin ohi du. Horrekin guztiarekin batera, maiz, pixari eusteko arazoak etorri ohi dira; baita sexu harremanetarako zailtasunak ere. Horri guztiari, pisua hartzea ere batu egin ohi zaio zenbaitetan”.

Jarduera fisiko programa

Horri guztiari buelta emateko Zubizarretak jarduera fisiko programa bat antolatzea gomendatzen du, eta kirol praktikara itzultzea. “Ama bihurtzen garenon lehen urtean arazo asko izan ohi ditugu kirol praktikara bueltatzeko, eta ikastaro honek bete betean arazo horri aurre egin dakiokeela uste dugu”.

Zortzi saioak osatzen dute ikastaroa. “Lehen bi saioetan, hipopresiba ariketen azalpenak eman eta entrenatuko ditugu. Hirugarren
saio batean, berariazko luzaketak irakatsiko dira. Beste saio bat, erditze osteko indar ariketa orokorrei buruzkoa izango da. Seigarren saioa, erditze ostekora bideratutako Pilateseko jarduera batzuk garatzeari buruz izango da. Azken biak, berriz, landutako eduki guztien
errepaso eta nor berak bere buruari saioak planifikatzen irakastea”, azaldu du Zubizarretak.

Informazio gehiago behar izanez gero: agorrosin@bergara.net