Errespetuzko sexu hezkuntza
Larraitz Arando 2013
Hitzaldi eta ikastaroei dagokienez, oraingoa aste emankorra izan dut. Aste berean hitzaldi bat jaso eta beste bat ematea tokatu zait. Bakoitza ikuspuntu ezberdinetik abiatuta izan arren, biak gurasotasunarekin eta heziketarekin lotutakoak izan dira.
Alde batetik, astean zehar Nerea Mendizabalen hitzaldian egon naiz: Errespetuzko harremanak. Gero eta ezagunagoa den “komunikazio ez bortitzaren” inguruan aritu ginen, Marshall B. Rosenberg-ek eskaintzen duen komunikazio ereduaz alegia. Pertsonalki komunikatzeko modu ausarta eta arduratsua iruditzen zait.
Nerea Mendizabal
Bestetik, aste berean guraso eskola bat ematea tokatu zait: “0-2 urteko haurrekin, sexualitate osasuntsu batetarako oinarriak eraikitzen”. Bertan ere komunikazioaz aritu ginean, gure seme alaben sexualitatea ulertzeko saiakeran erabiltzeko komunikazioan. Orain arte, guraso eskola hauetan gurasoei ez diet esku hartzeko eredu formula zehatzik eskaintzen. Ezta errezeta magikorik, ezta jarrera egokien zerrendarik …
Egia esan, bi hitzaldiek asko dute komunean: haur bakoitzaren erritmoa errespetatzea, bestea ulertzea, norberaren desirak identifikatzea, ondokoari horren berri ematea, norbere emozioen ardura hartzea, ….
Komunikazio ez bortitzaren ereduak, komunikatzeko beste lengoai bat eskaintzen du. Norberaren barruarekin lotura eginez eta parekoarekin lotura lortuaz. Berdinetik berdinerako komunikazioa. Berdin da alaba, aita, irakaslea, lankidea … . Bestearen azalean jartzea, sentitzen duena ulertzea eta norberarena errespetatzea. Enpatiazko komunikazioa. Bestea entzun eta ulertzen oinarritzen den komunikazioa. Guzti hau mehatxu, exijentzia eta zigorrik gabe egitearen artean.
Komunikazio hau garatzeko Marshallek 4 pausu zehatz eskaintzen ditu. Ariketa polita izan daiteke sexu hezkuntza egoera baten aplikatzea eta horrela errespetuzko sexu hezkuntza batetara bidean urratsak ematea.
EGOERAREN DESKRIBAPENA:
Alaba salan dago lurrean jarrita eta alua ukitzen ari da.
ORAIN ARTEKO JOEREN ARABERA, ZER EGINGO GENUKE ?
Ohiko joera batzuk hauek izan daitezke; bere arreta beste leku batetara bideratu (Amaia non utzi duzu jostailua? Nahi al duzu merienda? …), ekintza moztu (Amaia kendu eskua hortik), ihes egin (komuna garbitzen joan …), intentziodun galderak egin (zer gertatzen zaizu hor? …). Guzti hauek komunikazio zintzo bat eragozten dute. Nola lortuko genuke komunikazio autentikoago bat?
ERRESPETUZKO SEXU HEZKUNTZA
Ohiko joerak alde batetara utzi eta beste era batetan esku hartzen saiatuko gara. Goazen Marshallek proposatzen dituen lau pausoak egoera honi aplikatzen.
- Behaketa: Egoeraren ahalik eta objektiboen deskribatuko dugu.
- Alaba salan dago lurrean jarrita eta alua ukitzen ari da.
- Sentimenduak: Zer sortzen dit egoera honek nire barruan? Zein emozio sortzen dit? Norberaren barruan sentitzen duguna identifikatu.
- Ezinegona sortzen dit alaba horrela ikusteak. Zer egin ez dakit.
- Beharrak: Zer behar dut?
- Egoera saihestea, moztea. Ihes egitea …
- Eskaerak: Exijentzia gabe eskaera egitea. Baietza eta ezetza entzuteko prest egonik.
- Amaia, alua ukitzen ikusten zaitudanean urduri jartzen naiz. Ni hemen nagoenean, beste leku baten egitea posible zenuke?
Gogoratu eskaera hau ez dela exijentzia bat izango. Ondorioz, ezetza edo baietza jaso dezakegu bueltan eta horretarako prest egon behar dugu.
Jakin badakigu sexu hezkuntza ez dela hezkuntza orokorretik aparte dagoen zerbait. Pertsonak bere osotasunean hezten ditugu a eta ez drogetarako jarrera bat izaten edo sexualitaterako beste bat… Halere sexualitatearekin lotzen ditugun hainbat kontzeptuk (praktika batzuk, genitalak …) karga moral handia du eta horrek behar eta eskaeraren arteko bidea lausotzen du. Hots, alde batetik diskurtso aurrerakoiak eta bestetik belaunaldiz belaunaldi heldu zaigun moral epailea nahasten dira. Ondorioz, guri sortzen zaizkigun sentimenduak eta beharrak identifikatzea zailago izaten da. Are zailagoa beharra identifikatu ondoren, eskaera modu sinple eta garbi baten egitea.
Marshallek eskaintzen diguna sexu hezkuntzarako tresna indartsua izan daiteke.Hau barneratzeko eta lengoai horrekin aritzeko denbora behar da. Hasieran batez ere, energia asko behar da berau aplikatzeko. Eta gogoa. Egun guztiak ez dira berdinak eta egun bakoitzean ahal duguna egingo dugu eta ziur hori izango dela momentu horretan egin dezakegun onena.
Hemendik aurrerako guraso eskoletan baliteke gurasoei formula zehatz hau eskaintzea . Ez naiz formula zehatzen zale baina kontziente naiz guraso askorentzat errekurtso garrantzitsua izan daitekeela jarraitu beharreko pauso zehatz batzuk entzutea. Askorentzat kudeatzeko zailak diren egoeretan esku hartzeko tresna garrantzitsu izan baitaiteke. Behin pausuak gure eginez gero, autentikoago komunikatuko gara eta sexu hezkuntzan hori oinarrizkoa da.
Agian, hurrengo guraso eskola baten “errespetuzko sexu hezkuntza” baten inguruko interesarekin elkartuko gara guraso batzuk. Gustu handiz arituko nintzake gai horren bueltan
Askoz gehiago sakondu daiteke, hona hau sakontzeko liburu erraz bat: Resolver los conflictos con la Comunicación No Violenta.
Iruzkinik ez "Errespetuzko sexu hezkuntza"