Kalabaza sasoia da eta Gau Beltza ere badatorrela ikusita, errezeta proposamen bat jaso dugu ondorengo lerroetan, udazken garai honetarako ere aproposa dena: kalabaza betea, sarrazeno gariz, koko-esnez, arrautzaz eta feta gaztaz.

Osagaiak, lau lagunendako:

  • Kalabaza txikiak, pomarine deiturikoak, 4
  • Sarrazeno garia, 125 g
  • Koko-esnea, 80 ml
  • Arrautzak, 4
  • Feta gazta, 50 g
  • Oliba olioa, 2 koilarakada
  • Kominoa, apur bat
  • Piperrauts gozoa, pixka bat

Nola egin?

1- Hasteko, garbitu sarrazeno garia urarekin. Jarraian, egosi gatzarekin irakiten dagoen uretan, paketearen jarraibideen arabera. Pixka bat kirriskatsua gelditu behar da. Ur hotzarekin garbitu, egostea gelditzeko eta probatzeko.

2- Nahastu sarrazeno garia koko-esnearekin, kominoarekin eta piperrautsarekin.

3- Garbitu kalabazak eta moztu goiko aldea. Hustu zopa-koilara batekin.

4- Bete bi heren sarrazeno gariarekin, arrautzari eta gazta fetari lekua uzteko. Gehitu oliba-olio txorrotada eta itxi kalabazak. Labean sartu, 160 ° C-tan 25 eta 30 minutu bitartean, ondo eginda egon arte.

5- Kendu kapela kalabazetatik eta gehitu arrautza eta feta gazta. Jarri labean 5-10 minutu gehiago. Egiaztatu arrautza labetik atera aurretik eginda dagoela: zuringoak ondo egosita egon behar du, eta gorringoak apur bat likidoa.

Trikimailu bat: kalabazak zerbitzatu daitezke, gainetik zartaginean apur bat txigortutako kalabaza-pipak gehituz.

Bigarren trikimailua: errezeta horri alda dakioke barruan nahi dena gehituz; espelta, arroz integrala edo barazkiak, adibidez. Aukera ugari daude! On egin!

Iturria: Yuka.