Gipuzkoako Foru Aldundiaren kultura eta kirol departamentuak jakinarazi du erabakia hartu duela eskola kirola programa pandemia egoerara egokitzeko. Xehetasunak adosteko faltan koordinatzaileak hasi dira ikasturtea antolatzeko lanetan. Leintz Eskola Kiroleko koordinatzaile da Susana Santor.

Zer dakigu oraingoz eskola kirolaren ikasturte berriari buruz?

Zehaztutako markoa jaso dugu. Eusko Jaurlaritzak egindako protokolotik abiatuta egin dute. Adin ezberdinetako ikasleekin kontuan hartu behar ditugun hainbat irizpide zehazten dituzte, hala nola taldekatzeak, protokoloak, ikastetxeetako kontingentzia planetan jasotakoak… Horiek denak kontuan hartuta gure protokolo propioak egin behar ditugu. Ezagutzera eman eta gainbegiratuak izango dira onespena jaso arte.

Formazio saio batzuk ere ezarri dira bai koordinatzaileentzako bai hezitzaile izango direnentzako denok kontingentzia plan horien gaineko irizpideak ezagutu eta gure ekintzak modu egokian egokitzeko egoera berezi honetara.

Bizkaian eta Araban ikasturte hasiera zehazteke dago oraindik. Gipuzkoaren kasuan jardueren hasierak badu data, ezta?

Bai, iraila izango da protokoloak egokitzeko, programak gaur egungo egoerara prestatzeko eta izen-ematea egiteko. Gero, pandemiaren bilakaerak ahalbidetzen duen heinean asmoa da eskola kiroleko astean zeharreko ekintzak urriaren hasieran jartzea martxan. Asteburuetako topaketak eta lehiaketak, ordea, ez. Horiek urtarrila aldean etorriko direla aurreikusten da.

Eskola Kirola jarduerak pandemia garaietara egokitzea da proposamena… Zeintzuk dira egin beharreko egokitzapenak?

Ezarritako protokolo guztiak aztertzen ari gara, eta egin ohi ditugun ekintzak kontuan hartuta ari gara definitzen zein izan daitekeen gure eskaintza.

LH1eko eta LH2ko ikasleentzako jolasak egiten ditugu, eta saiatuko gara modu indibidualean edo talde txikietan egiteko modua proposamena prestatzen.

LH3tik gorako ikasleentzako kirol aniztasunean oinarritutako multikiroleko programa bat izaten dugu. Askotariko kirolak ezagutzen joateko programa izango da, eta aztertu beharko dugu ze modutan egokitu dezakegun modalitate bakoitza ezarrita dauden irizpideetara. Jarduerak modu ahalik eta indibidualenean eskaintzeko, talde txikietan eta eskoletan ezarritako bizikidetza talde iraunkorretan oinarrituta… Hori guztia aztertu behar dugu eta horrekin batera bideragarritasuna, azpiegitura aldetik nahikoa dugun eta halakoak… Erronka garrantzitsua dugu, baina saiatuko gara gure gazteentzat eskaintza dibertigarri eta polit bat diseinatzen aurten ere.

Zergatik da garrantzitsua eskola kirola?

Garrantzitsua da proiektu hezitzailea delako. Kirolaren bitartez hezten ditugu umeak. Sozializatzen dira, ondo pasatzen dute, lagunak egiten dituzte, jarduera fisikoa egiten dute, askotariko kirol modalitateak ezagutzen joaten dira, ohitura osasuntsuak barneratzen joaten dira… Eta ikasle guztientzako dago zabalik baita ere bestelako kirol jardueretan parte hartzeko aukerarik ez dutenentzako edota aniztasun funtzionala dutenentzako.

Beste jarduera askorekin gertatu moduan martxoan gelditu ziren bertan behera eskola kirola jarduerak. Umeak eta gurasoak itzultzeko gogoz ikusten dituzue?

Bai. Online egindako saioetan sumatu genuen, eta baita ere kalean ikusi ditugunean. Bueltatzeko zoratzen daude. Egia da konfinamendu garaian ideia oso politak izan zituztela eta ekarpen oso interesgarriak egin zituztela. Konfinamenduan asko ikasi dugu, tartean gauza asko egin daitezkeela eta egiten ari ginen hori ez zela egin zitekeen gauza bakarra. Agian, norberak ere etxean egin ditzakeela hainbat gauza eta familiakoekin ere asko parteka daitekeela.

Argazkiak: Adi Goldstein eta Goiena.