Foru Aldundiak iragarri du EAEko Justizia Auzitegiaren epaiari helegitea jarriko diola.

Orain arte, Gipuzkoan, 13 urtera arteko gazte batek kirol jarduera federatu bat egin nahi bazuen, klub bat ordezkatuz, eskola kirolean ere esku hartu behar zuen. Exijentzia hori Gipuzkoako Foru Aldundiak markatu zuen aspaldi –1989an onartutako foru-dekretu baten bidez–, zenbait helburu lortzeko asmoarekin. Esaterako, haurraren garapen-etapak eta ezaugarriak errespetatzea, askotariko kirol-jarduerak ezagutzeko aukera ematea eta hezkuntza-garapen integrala bermatzea. Derrigortasun horrek, baina, kluben eta gurasoen protestak eragin izan ditu behin baino gehiagotan.

Orain, Pasaiako familia batek helegitea jarri du derrigortasun horrekin lotuta, eta EAEko Justizia Auzitegi Nagusiak arrazoia eman dio. Familia horretako 9 eta 11 urteko alabek saskibaloian jokatu nahi zuten, baina ez zuten eskola kirolean parte hartu nahi. Epaileak esan du multikirol programan derrigor parte hartu behar izatea adingabeen eskubide indibidualen kontra dagoela. Foru Aldundiak iragarri du ebazpenari helegitea jarriko diola, eta egungo eredua defendatu du.