Bada eztabaida neska-mutikoei zuzendutako eskola kirola programaren inguruan. Aste bukaera honetan beste behin mobilizatu dira Bultza Kirola plataforma osatzen duten 500 elkartetik gora. Eskatzen dute azarotik etenda dagoen programa berriz abiarazteko.

Badira, ordea, bestelako iritziak ere. Tartean dira Bilboko medikuntza zientzien akademiako kideak. Ukatu gabe ariketa fisikoa egiteak onura handiak dituela neska-mutikoen osasunerako uste dute ez dela unerik egokiena eskola kirolarekin lotutako jarduerak berriz abiarazteko. “Une honetan zuhurtasunari eta erantzukizunari eman behar zaie lehentasuna, praktika jakin batzuek birusa hedatzen lagun ez dezaten”.

Besteak beste, Eunate Ganuza medikuak eman ditu azalpenak, eta esan du Bilboko medikuntza zientzien akademiatik gomendatzen dutela une honetan jarduera horiek ez abiaraztea, “batez ere II/III agertokiko pandemiaren egungo egoeragatik, Gabonetako jaien ostean kasuen igoera handitzea aurreikusten delako, urteko aldiarengatik –negua–, eta txertaketa-aldia hasi aurretik COVID-19aren aldaera berria zabaltzeko aukera ahalbidetu daitekeelako”.

Azpimarratzen dute gomendio hori egungo egoera epidemiologikora mugatzen dela. “Hurrengo asteetako intzidentziaren bilakaerak hobera egiten balu irizpide malguagoak ezartzeko aukera aztertu beharko litzateke”.

Gogorarazten dute ahalegin fisikoaren ondorioz arnasketa handitu egiten dela horrek aireztapena areagotuz. Horrekin batera azaltzen dute zenbait kirolek jokalarien arteko kontaktu estua eskatzen dutela.

Jarduera fisiko seguruagoak

Bilboko medikuntza zientzien akademiatik seme-alabekin jarduera fisikoa praktikatzera animatzen dituzte familiak. Horrekin batera banakako kirolak lehenestera.

Hainbat argibide ematen dituzte pandemia egoera honetan kirola nola praktikatzea komeni den azaltzeko, eta horrekin batera kirolariek zein hezitzaileek kontuan hartu beharreko segurtasun neurriak zeintzuk diren.

Albistearen iturria hemen (gazteleraz)

Argazkia: Isaiah Bekkers.