Aramaioko herri eskolan oso gustura irakurketa dialogikoan oinarritutako ekimenak emandakoarekin.
Ikasleen artean balio hezitzaileak sustatu eta irakurzaletasuna bultzatzeko, Irakurrin Kurrin ekimena gauzatu zuen San Martin eskolak maiatzaren 9an, irakurketa dialogikoan oinarrituta. Denon artean liburu bat aukeratu zuten — Patxi Zubizarreta idazlearen Xia Tenzinen bidaia miresgarria—, ikasleek zein gurasoek aldi berean irakurri zuten etxean, eta gero denon artean komentatu zuten.
San Martin eskolak elkarbizitzaren eta eskolako komunitatea osatzen duten guztien parte-hartzearen aldeko apustua egin du eta horren barruan kokatzen da egitasmoa. Ideia, eskolako batzorde iraunkorrean sortu zen –irakasleak, gurasoak eta Udaleko ordezkariek osatzen dute– eta izena ikasleek eurek aukeratu zuten. Lehen Hezkuntzako 4. mailako ikasleek, euren gurasoek eta irakasle talde batek hartu zuen parte. Afari txinatarra, solasaldia eta jaia egin zuten egun horretan.
Balorazio positiboa
31 lagunek egin zuten bat ekimenarekin, horietatik 17 ikasle. Balorazio “ezin hobea” egin dute parte hartzaileek eurek: “Balorazioa egiteko orriak pasa ditugu eta guztiak izan dira positiboak. Primeran pasa zutela esan digute”, adierazi du Mari Karmen Garrido irakasleak. Protagonistak ere, oso pozik: “Ume batzuk esan ziguten uste zutela solasaldia izango zela aspergarriena. Baina ez, saioa bera aparta izan zela esan ziguten. Gainera, batzuk hurrengo urtean eskolan egongo ez direnez etortzeko aukerarik izango zuten galdetu ziguten eta gehienek hurrengorako hainbat proposamen egin zituzten”, dio Maite Del Rey gurasoak.
Izan ere, hurrengo ikasturtean halako beste bi edo hiru saio egingo dituzte: “Berria da guretako, Irakurrin Kurrin aitzindaria izan da. Baina izan duen harrera ona ikusita, hurrengo ikasturtean bi edo hiru gehiago egiteko asmoa dugu. Irailean hasiko gara batzorde iraunkorrean lanean”. Ideia berriei zabalik daude, baina formatua mantendu egingo dute: afaria, irakurketa dialogikoan oinarritutako solasaldia eta amaierako festa.
Albistearen eta argazkiaren iturria hemen.