Eskolako jolas-orduari duen garrantzia aitortzen zaio?
Zenbait ikastetxetan jolas-ordua murrizten ari dira, eta beste batzuetan hezitzaile bereziak ipintzen dituzte.
Ameriketako Estatu Batuetako Stanford unibertsitateak egindako ikerketa baten ondorioek diote eskolako jolas-orduaren nolakotasunak eragina duela ikasleen ongizatean, ikastetxeko giroan eta ikasleen emaitza akademikoetan. “Jolas-orduari, askotan, ez zaio duen garrantzia aitortzen baina ikerketan ikusi dugu kalitatezko jolas-ordua eskaintzeak modu oso positiboan eragin dezakeela”, dio ikerketako parte izan den Milbrey McLaughlin ikerlariak.
Estatu Batuetan eta maila ekonomiko txikiko ikasleak dituzten ikastetxeetan egin dute, bereziki, ikerketa izan ere hainbat ikastetxetan konturatuak ziren diziplina arazo larrienak jolas-orduan eta jangela orduetan ematen zirela. Gaiak merezi du gogoeta.
Jolas-ordu planifikatua
Estatu Batuetako zenbait eskolatan Playworks izeneko programa dute martxan. Hezitzaile bereziak dituzte jolas-orduetan eta pertsona horien zeregina da ume guztien ongizateaz arduratzea. Lan egiten dute jolas-ordu integratzailea sustatzeko, lagunak egiteko zailtasunak dituzten haurrei zailtasun horiek gainditzen erakusteko, eta gatazkak sortzen direnean umeei irtenbideak topatzen laguntzeko. Standford unibertsitateko ikerlariek diote hobetu egiten dela eskolako giroa, eta gutxitu egiten direla eskola jazarpen egoerak. Azken finean, heldu baten gainbegiratzea eta gidaritza suposatzen du.
Ikerlariek behaketa egin dute programa ezarri duten hainbat ikastetxetan eta ondorioztatu dute giroa hobetu egin dela, laguntasuna sustatu dela eta hobetu egin dela umeen hizkera.
Norainoko planifikazioa?
Badira ekimenarekin guztiz ados ez dauden sektoreak ere. Zalantzak dituzte badaudelako umeak eguneko ia tarte guztiak helduek planifikatutako ekintzetan ematen dituztenak. Garrantzia ematen diote jolas libreari eta gehiegizkoa iruditzen zaie jolas-ordua ere helduek planifikatzea. Ondo ikusten dute arazorik sortuz gero helduek umeen jardueretan esku hartzea, baina ez hainbeste ekintza antolatzea eta horietan parte hartzea. “Umeek aukera izan beharko lukete jolasa aukeratu eta talde txikietan aritzeko”, dio Alliance fundazioko kide Edward Miller-ek. “Umeak oso gai dira sortzen zaizkien arazo askori helduen laguntzarik gabe aurre egiteko”, gaineratzen du.
Ikerlariek behaketak egiten jarraitzen dute AEB-tan.