Gurasoei eta haurrei zuzendutako galdetegia prestatu du Aztikerrek, ikastetxeetarako itzulera honetan dagoen giroari “tenperatura hartzeko”. Asier Etxenike da ikerketa soziologikoaren arduraduna, eta horren inguruko xehetasunak azaldu ditu.

Ezohiko ikasturte honetan dauden “sentsazioak eta iritziak” jasotzea helburu duen galdetegia prestatu du Aztiker kooperatibak, eta familiei eskatu die galderak erantzun eta inguruan zabaltzeko.

Asier Etxenike arduradunak azaldutakoaren arabera, saiakera egin nahi izan dute familien jarrerak zeintzuk diren ikertzeko. Ostiralean, hilak 4, argitaratu zuten galdetegia eta dagoeneko 700 bat erantzun jaso dituzte: “Sentsazio oso positiboa dugu, harrera ona izan du; agian, norberaren irtzia emateko beharra zegoelako”.

Galdetegiak hainbat atal ditu, eta askotariko gaiak jorratzen dira bertan: segurtasun neurriak, ikastetxeen autonomia, hilaren 15eko greba deialdia, jantokiak eta eskolaz kanpoko jarduerak, haurren egoera emozionala eta premiak… Etxenikek agitu du norbanakoak erantzun beharrekoa dela inkesta –amak edo aitak–, baina atal batzuetako galderak familia guztiari zuzendutakoak direla. “Eskolarizatutako haurrak dituzten familiak dira galdetegia erantzun behar dutenak, eta laguntza eskatzen ari gara zabalkunderako: gurasoen WhatsApp taldeetan elkarbanatzea eskatzen dugu”, gehitu du.

Bi hipotesi nagusi

Asier Etxenikek azpimarratu du iazko kurtso bukaera kontuan hartuta, eta egoera honen aurrean, ezohiko ikasturte bati ekitera doazela familiak. Hala, haurrak zein behar eta gabeziarekin itzultzen diren jakin nahi du ikerlariak. Horri lotuta, hipotesietako bat da umeak akaso behar bereziak izango dituztela oraingoan –emozionalak, akademikoak edota euskarari lotutakoak–. “Esku-hartze bereziak beharko direlakoan gaude”, adierazi du.

Bestetik, Etxenikek sumatzen du gurasoak kritiko agertuko direla galdetegian. Alde batetik, baliabiderik ez direla jarri esanez, eta bestetik, hartutako neurriak egokiak ez direla salatuz.