Haur eta gazteendako irakurgai egokiak aukeratzea ez da gauza erraza. Bada, ordea, zeregin horretan diharduen lan talde bat Eskoriatzan: Mondragon Unibertsitateko Haur Liburu Mintegian, hain zuzen ere. Hainbat liburutegietako arduradunek eta irakaskuntza munduko profesionalek hartzen dute parte mintegi horretan, eta badira 25 urte lanean diharduela. Eskoriatzako Huhezi fakultatean egiten dituzte lan bilerak.

32-673-GidaNag

Helburua da aurreko urtean euskaraz kaleratutako haur eta gazteen liburuak zerrendatzea, aztertzea eta baloratzea. Lan horren emaitza da Mondragon Unibertsitateak urtero kaleratzen duen Haur eta Gazte Literatura gida. Argitalpenak mintegiko kideen iritziz gomendagarriak diren liburuak jasotzen ditu, eta unibertsitatearen atari digitalean aurki daiteke pdf formatuan.

25 urte lanean

“Gauzak asko aldatu dira, baina orain 25 urte apenas zegoen haur liburutegirik. Eskoletan liburutegi falta zegoen, eta haur literatura gutxi zegoen. Eta batez ere oso formazio gutxi zegoen haur literaturaren inguruan”, azaltzen du Haur Liburu Mintegiko arduradun Nerea Alzolak. “Kataluniako talde baten berri izan genuen, eta gurera gonbidatu genituen Eskoriatzako Haur Liburu Mintegia sortzen laguntzeko. Bi helburu genituen: haur literatura ezagutzea eta gure burua janztea edo prestatzea. Garbi genuen eta dugu irakurlearen prestakuntza irakurrita egiten dela”.

Hasieratik dihardu Haur Liburu Mintegian Oñatiko udal liburutegiko Arantzazu Ibarrondok. “Urteotan gure liburutegiek izan duten bilakaera izugarria izan da, eta euskarazko liburuen produkzioak zer esanik ez! Orain 25 urte baino askoz ere gehiago kaleratzen dira”, adierazi du.

“Guk egiten duguna da irakurri, irakurri eta irakurri. Gure artean banatzen ditugu irakurri beharreko liburuak eta gehienetan batek baino gehiagok irakurtzen du liburu bakoitza. Gero aipatzen dugu zer iruditu zaigun. Batzuetan ados gaude, beste batzuetan ez, eta horrelakoetan hirugarren edo laugarren iritzi bat eskatzen dugu. Horrela egiten dugu aukeraketa prozesua”, azaltzen du Alzolak. “Aukeraketa egiteko erabiltzen ditugun irizpideak asko dira: hizkuntzaren kalitatea, erabilitako figura literarioak, gaiaren trataera, pertsonaiak nola landu diren, liburuaren hasiera, liburuaren bukaera, istorioaren sinesgarritasuna… Eta horien arabera baloratzen dugu”.

Oso gomendagarrien gida

Haur Liburu Mintegian zuzenean aztertzen dute euskaraz kaleratzen den produkzioa, eta urteotan 1.600 liburutik gora gomendatu dituzte. Orain, azken hamar urteetako gidak abiapuntu hartuta liburu oso gomendagarrien irakur gida argitaratu dute. Argitalpen berezia eta aurreko urteetan egindako liburu gomendagarrien gidak formatu digitalean dago eskuragarri hemen. 192 liburu jasotzen ditu argitalpen berriak.

Captura de pantalla 2016-02-18 a las 18.11.20

 

 

 

 

 

 

Haur eta Gazte Literatura Irakur Gida 2001-2014

Gomendatutako liburu bakoitzaren gaineko informazioa eta iruzkina jasotzen ditu gidak. Taldeak, orain, uztailean argitaratuko den irakur gida prestatzen dihardu. 2015. urteak emandako liburu onenak jasoko ditu.