Eskuak zikintzea, ikasteko modurik egokiena

Ikasteko modu egokiena  eskuak zikintzea omen da. Hori da Tierra en las manos Blogak aldarrikatzen duena, bertatik ekarri dugu artikulu hau. Proiektu interesgarria iruditu zaigu.

Naturaren eragina haurrengan. 7 aldaketa onuragarri.

Haurrek jolasten duten testuinguru eta espazioak beraien jarrera eta jarduteko moduetan eragiten du. Ez zaigu arraroa irudituko jende asko eta zarata dagoen lekuetan jolasa azkarra eta kaotikoa dela esaten badugu eta leku argi eta ordenatuan berriz lasaiagoa eta sakonagoa.

Irudikatu  dezagun beraz, nolako aldaketa atzeman daitekeen jolasaren kokalekua natura bera denean, edo jostailu eta objektu gabeko kanpo espazio bat, naturak eskainitako elementuen estimulu bakarrarekin.

Blog honen atzean daudenek aurten denbora asko pasatu dute kanpoaldean, eta aldaketak nabaritu dituzte testuingurua espazio itxietatik irekietara aldatzean. Blogaren arduradunaren hitzetan kanpoaldean jolasteak onurak besterik ez dakartza eta naturarekin harremanetan bada askoz hobeto. Aldaketa guztiak onerako izan omen dira.

Gero eta Baso Eskola gehiago daude eta gero eta Eskola gehiagok egokitzen dituzte beraien kanpo espazioak (jolaslekuak) naturarekin harreman gehiago izateko. Argi dago naturarekin harreman zuzenean ikastea liburuetatik ikastea baino interesgarriagoa dela, horretaz gain, haurrak testuinguru naturaletan estres gutxiagorekin eta askoz lasaiago egoten direla ziurtatzen du blogaren arduradunak.

Azterketa asko daude gaiaren inguruan baina aldaketa nabarmenenen inguruan hitz egin nahi izan dute blogean, kanpora irtetearekin batera nabari daitezkeenen inguruan hain zuzen. Eta aldaketak garrantzitsuak dira. Zeintzuk diren jakin nahi?

1. Neska eta mutilen arteko zatiketa gutxiago.

Etxean edo haurren hezkuntzara bideratutako edozein espazio itxik, haurrek beraien generoari egozten zaizkien materialekin jolastea eragiten dute, nahiz eta guk mota guztietako jolas eta materialak eskaini.

Blogaren arduradunak dio hau egoera ezberdinetan ikusteko aukera izan duela eta espazio itxietan neskek panpinekin eta mutilek autoekin  jolasten dutela ikusi duela ( asko orokortuz noski, nabarmentzen du ). Kanpoaldeko jolasetan aldiz, jolas dinamikoak nabarmentzen dira eta hauetan haurren arteko ezberdintasunak gutxitu egiten dira.

Naturan ez daude neska eta mutilentzako elementuak, “Unisex” da dena. Haurrek berdin jolasten dute egur edo harriekin eta berdin igotzen dituzte zuhaitz edo menditxoak, generorik gabeko jolas gehiago antzematen dira.

2.haurren arteko gatazka gutxiago sortzen dira.

Naturako elementuak ez dira inorenak eta haurrak horren jabe dira. Naturak jolaserako baliabideak eskaintzen dizkigu baina material horiek ez dira geureak. Eta honek, “hau nirea da!” edo “hau nik daukat” bezalako gatazkak edo panpina edo bizikleta bategatik sortzen diren gatazkak saihesten ditu. Gatazka hauek txarrak izan ez arren eta askotan ikasteko beharrezkoak direla jakitun, naturan jolasteak testuinguru lasaiagoak sortzen ditu.

3.Naturan estres gutxiago pilatzen da.

Aurreko puntuarekin lotuta, naturak testuinguru lasaiagoak eskaintzen ditu, naturan ez dago paretarik haurrei mugak jartzeko, ez eta haurrak gogaituta egoteko  espazio txiki edo itxirik.

Naturan, egun txarra duen haurra bakarrik egon daiteke, ingurutik deskonektatu daiteke. Horretarako nahikoa da  harri baten atzean esertzea edo zuhaizka batean ezkutatzea.

4. Naturak taldean lan egitea errazten du.

Blogeko arduradunak ikusi duenez, haurrak kanpoaldean eta batez ere naturarekin harremanetan daudenean, elkarlanerako prestuago daude. Badakite batek bakarrik ezin duela enbor handi bat mugitu edo txabola polit bat egin… eta norbait saiatu eta lortzen ez duenean beti doa beste norbait laguntzera. Modu naturalean antolatu eta lan taldeak sortzen dituzte.

5. Kanpoaldean jolasteak, haurrek beraiengan duten konfiantza gehitu eta arriskuak beraien kabuz neurtzea ahalbidetzen du.

Aire librean jolasteak, izan jolasleku batean, ondo  pentsatutako parke batean,  edo natur gune natural batean arriskuak neurtu ahal izateko aukera mugagabeak eskaintzen dizkie haurrei. Zuhaitz batera igo aurretik ondo pentsatu behar dute nola igo, eta noski baita nola jaitsi ere. Harri baten gainera igo aurretik gainean oreka mantentzeko gai diren pentsatu behar dute. Beste batzuetan gai ez direla pentsatu arren saiatu egingo dira … eta batzuetan beraien harridurarako lortu egingo dute!

Guzti honek, zailtasunak neurtzeko, lorpenak zein arriskuak aurreikusteko… mila aukera eskaintzen ditu eta egiteko gai direla jabetzeko konfiantza sortarazten die.

6.Irudimena garatzen du

Material artifizialik eta itxura batean jostailurik ez egoteak haurrak beraien kabuz jolasak eta jostailuak sortzera behartzen ditu. Hau behatzea oso polita dela deritzo blogeko arduradunak,  asperdurarako momentuak egon daitezke baina naturak beti eskainiko dizkie motibagarriak diren elementuak eta onena zera da,  motibazio  hau haurren barrenetik irteten dena dela.

Itsasoan edo mendian, naturan aurkitzen ditugun elementu guztiak ez egituratuak dira, ez dute jolaserako helbururik eta honegatik mila aukera eskaintzen dituzte  irudimena landu eta jostailuak sortzeko.

Blogeko arduradunaren iritziz gozagarria da haurrak testuinguru hauetan jolasean ikustea, makilak espata bilakatzen dira, lokatza txokolate, enborrak automobil … muga bakarra irudimena da.

7. Haurrak zoriontsuago eta alaiago daude naturan.

Eta arrazoi hau da denetan garrantzitsuena … haurrak naturan zoriontsu dira. Ez al zaizue iruditzen txikienak basoan korrika, saltoka, ezkutaketan, zuhaitzetara igotzean, belarrak lurretik ateratzean, …  benetan gozatzen ari direla?

Tierra en las manos blogaren arduradunak hau nabarmentzen du, eta gainera ura ere inguruan badago … zer esanik ez!

Artikulua amaitzeko idazleak dio benetan  haurren portaeran aldaketa nabariena hauek naturatik urruntzean gertatzen dela eta ez hauek naturara gerturatzean. Naturarekiko urruntasunak estresa sortarazten die, kanpo estimuluen beharra eta kanpo motibazioaren beharra.

Bestalde, egileak ez du  idatzi honekin naturarekin harremana idealizatu nahi, baina bai kanpo espazioek eskaintzen dizkiguten aukerak nabarmendu. Haurrek kanpo espazioetan, unean une beraien garapenera egokitzen diren erronka eta aukera ugari aurkitzen dituzte.