Hautsak harrotu ditu Maria Jesus Montero ministroak goizean egindako iragarpenek. Iragarri du 14 urtetik beherako neska-mutikoek irten ahalko direla apirilaren 27tik aurrera, baina helduek baimenduta dituzten jardueretan laguntzeko. Ez beste ezertarako.

Orain minutu gutxi, ordea, Salvador Illa osasun ministroak bestelako iragarpena egin du. Ez du argibide handirik eman baina atzera egin, eta haurrek paseatzeko aukera izango dutela esan du. Gainera, apirilaren 26tik aurrera. Domekatik aurrera, beraz.

“Entzuten duen Gobernua da hau, eta bihar onartzen bada Kongresuari proposatuko diogun alerta dekretu berria larunbatean bertan agindu bat emango dut umeek paseoak egiteko baimena izan dezaten. Hala, domekan sartuko litzateke indarrean. Paseo horiek zer nolako baldintzetan egin beharko diren aurrerago zehaztuko dugu”, esan du.

Argazkia: Marjorie Bertrand