Pasa den irailaren 28an Bergarako Herri Hezitzailea taldeak sustatuta Jolasa Plazara ekimena gauzatu zen. Ekimena esperimentu gisara aurkeztu zuten antolatzaileek eta Herri Hezitzaile batean herrigintzako eragile ezberdinek egiten duten lan hezitzailea balioan jartzeaz gain haurren parte hartzearen eta jolasaren garrantzia aldarrikatu zituzten.

Esperimentuan, haurren sormen gaitasuna baliatu  zuten  klariona eta kartoia beraien eskura utziz, haurren iritzia ere jaso zuten, oihal erraldoi batean “nolako Bergara nahiko zenuke? galderari erantzun zioten herriko haur ezberdinek. Herrigintzako eragile ezberdinak ere gerturatu ziren plazara, Martxanterak, Kukubaso, Euskal Herrian Euskaraz, Jardun euskara elkartea, Erein eta Jan, Ndank Ndank… eta guztiek egiten duten lana herri hezitzailearen logikan kokatu zen.

Txapa Irratiak irratsaioa egin zuen esperimentuak iraun zuen bitartean,   udal ordezkariak ere bertan izan ziren bai politikari, tekniko eta langileak ere.

 Baina egunari saltsa eta piperra gehitu  ziona Porrotx izan zen. Porrotx bete betean sartu zen esperimentuan, sortutako kaosari pailasoen kaos propioa gehituz, sinpletasunez eta naturaltasunez magia eginez.

Musika eskolako trikitilariak eta erraldoein konpartxako buruhandiak lagun kalejira batekin amaitu zen esperimentua.