Ostiralean inauguratu zuten Bergarako Aranzadi ikastolako atzeko patio berritua. 2017an abiatu zuten prozesua eta urtarrilaren 17an hasi ziren umeak eskola orduetan jolasleku berritua erabiltzen.

Auzolanean egin dute proiektua: “Eskerrak eman nahi dizkiegu parte-hartze prozesua diseinatu eta gauzatu duten guraso eta irakasleei, auzolanean buru-belarri aritu diren ikasle, guraso eta irakasleei, berrerabiltzeko materiala eskaini diguten herritar eta enpresei…”, adierazi zuten inaugurazioaren egunean.

“Inklusiboa eta hezitzailea”

2017an abiatutako proiektua da atzeko patioan jolasleku “inklusibo eta hezitzailea” sortzearena: “Parte-hartze prozesu emankorra gauzatu zen 4-5 urteko ikasleekin eta hainbat irakasle eta gurasorekin, eta bertan zehaztu zituzten patioak jaso beharreko hainbat elementu: jolas sinbolikorako bitartekoak, etxolak, material naturalak –egurrak, lurra, ura, landareak…–, harea-gunea, oreka-jolasak… Guzti-guztiak haurrek esperimentatzeko duten beharra asetzeko”.

Iturria: Goiena.eus.