Educer erakundeak sorturiko Etxean erditzearen inguruko gida euskaratu zuen Sabeletik Mundura ekimenak orain dela urte batzuk. Alicanterako sorturiko gida izan arren, hemengo etxeko erditzeetarako ere baliagarria da. Ondoren, kasuan kasu hautaturiko emaginarekin hitzartu beharko da erditzearen inguruko guztia.

Etxean erditzea oraindik ere osasun siatema publikotik kanpo dago. Baina geroz eta gehiago dira etxean erditzea erabakitzen duten emakumeak. Etxean erditzea ospitalean erditzea bezain segurua da, baldin eta emagina batek (gutxienez) lagunduta egiten den eta haurdunaldia normal joan den. Ospitalea 30 minutuko gehienezko tartean egotea eskatzen da, edozein arazo sortuko balitz, ama ospitalean artatua izan dadin.

Etxeko erditzeetan emakumea izaten da protagonista, sentitzen duena edo nahi duena egiteko aukera du eta emaginak, bere beharren arabera egiten du lan. Emaginaren funtzioa ama eta haurra ondo daudela ziurtatzea da erditzeak irauten duen bitartean, amari behar duen segurtasuna ematea eta erditu ostean haurra eta amaren osasun egoera ona dela ziurtatzea. Arazorik balego, konponbidea azkar eman edo ospitalera joatea gomendatuko du.

Etxeko erditzean, haurra jaio eta haurrondokoa bota ostean ordu pare batez emagina etxean egoten da arazorik sortuko balitz detektatzeko eta ama-haurraren lehen uneak zaintzeko. Edoskitzea ezartzen laguntzen du eta haurra zein ama ondo daudela baieztatzean joaten da. Erditze osteko lehen egunetan ere jarraipena egiten die ama-haurrari.

ZER BEHAR DA ETXEAN ERDITZEKO?

– Haurdunaldian arazorik egon ez izatea.

– 37-42 asteen artean erditzea.

– Ama zein haurra osasuntsu egotea.

– Ospitalea 30 minutuko distantzian egotea.

– Ospitalera joateko bidea, modua eta zeinek eramango zaituen zehazturik izatea.